Ինչ է սպասվում հայ միգրանտներին Ռուսաստանում

Լրագիր / Հայաստանի և Ռուսաստանի տնտեսությունում նմանատիպ իրավիճակ է ստեղծվել. մինչ տնտեսությունը, ըստ վիճակագրության, աճում է, պակասում է զբաղվածների թիվը: Եթե ՌԴ տնտեսական զարգացման նախարարությունը դա բացատրում է աշխատանքի արտադրողականության աճով, ապա Հայաստանի կառավարությունում դեռ չեն նշել, թե որն է պատճառը:
Հայաստանի կառավարությունն այս տարվա համար կանխատեսել է 3.2 % տնտեսական աճ, իսկ կիսամյակի կտրվածքով աճը կազմել է 6.2 %: Ֆինանսների նախարար Վարդան Արամյանը նշել է, որ այդ աճն ապահովելու համար կան արտաքին բարենպաստ հանգամանքներ, որոնցից մեկը Ռուսաստանում տնտեսական աճն է: Չնայած վերջին ամիսների դրական դինամիկային՝ ՌԴ տնտեսական աճի տեմպերը հուլիսին դանդաղել են 1.5 %, սակայն պահպանվում են Հայաստանի կառավարության ծրագրերի համար բարենպաստ միջակայքում: Ըստ «Վալդայ» ակումբի վերլուծաբանների կանխատեսման՝ այս տարի ՌԴ տնտեսական աճը կկազմի 1.4%:
Ռուսաստանում աճի դանդաղումը պայմանավորված է գյուղատնտեսության, արդյունաբերության, առևտրի թույլ ցուցանիշների հետ, որը մասամբ փոխհատուցվել է շինարարության ոլորտում 2.7% աճի շնորհիվ: Հայաստանում շինարարությունը, ընդհակառակը, շարունակում է նվազել. տարեկան կտրվածքով անկումը կազմել է 10 %:
Ինչպես հայտնի է, Հայաստանից Ռուսաստան արտագնա աշխատանքի մեկնողների մեծամասնությունը զբաղված է շինարարության և առևտրի ոլորտում:
Ռուսաստանում շինարարության ոլորտի աճը, ըստ Ալֆա բանկի գլխավոր տնտեսագետ Նատալյա Օրլովայի, հիմնված չէ ֆունդամենտալ գործոնների վրա և ցանկացած պահի կարող է ավարտվել: Նա շինարարության ոլորտում ներդրումների աճը պայմանավորում է մի շարք պետական խոշոր ծրագրերի, օրինակ՝ Կերչի նեղուցի կամրջի և Մոսկվայի բնակֆոնդի վերակառուցման հետ:
Այս տարվա հունվար-հուլիսի տվյալների համաձայն՝ Ռուսաստանի կազմակերպությունների 31.6%-ը վնասով է աշխատում, ինչը նախորդ տարվա նույն ժամանակահտվածի համեմատ ավելի է 0.8%-ով, վկայում են ՌԴ վիճակագրական ծառայության հրապարակած տվյալները: Ընկերությունների շահույթն էլ նվազել է 10%-ով: Շահույթի ամենամեծ անկումը գրանցվել է շինարարություն և մանրածախ առևտրի ոլորտներում: Շինարարական կազմակերպությունների ընդհանուր շահույթը նվազել է 63.3%-ով, իսկ մանրածախ առևտրի կետերինը՝ 30%-ով: Վնասով աշխատող շինարարական կազմակերպությունների թիվն է աճել է 1.4%-ով եւ կազմել 31.1%: Առևտրի և ավտոտրանսպորտային միջոցների վերանորոգման ոլորտում վնասով է աշխատում ընկերությունների 22.7%-ը: