Ուկրաինայում ուժգնանում է հիստերիան՝ Սահակաշվիլիի դեմ

Վրաստանի նախկին նախագահ և Օդեսա շրջանի նախկին նահանգապետ Միխեիլ Սաակաշվիլիի դեմ ուկրաինական դատարաններ պատվի, արժանապատվության և գործնական հեղինակության մասին չորս հայց է ներկայացվել։ Հայցերը ներկայացրել են երկրի ներքին գործերի նախարար Արսեն Ավակովը, Պետական ֆիսկալ ծառայության ղեկավարի պաշտոնից հեռացված Ռոման Նասիրովը և Գերագույն ռադայի երկու պատգամավոր՝ Սերգեյ Պաշինսկին ու Անդրեյ Իվանչուկը, գրում է «ՌԻԱ Նովոստի»-ն:

Հայցերի մասին տեղեկատվությունն առկա է Ուկրաինայի դատական իշխանության կայքում:

Հաղորդվում է, որ Ավակովի հայցի քննումը նշանակված է 2017 թվականի սեպտեմբերի 18-ին, Նասիրովի հայցի քննումը՝ 2017 թվականի սեպտեմբերի 8-ին, իսկ պատգամավորների հայցերի քննումը՝ 2017 թվականի հոկտեմբերի 9-ին և դեկտեմբերի 8-ին:

Օգոստոսի 31-ին Սաակաշվիիլն հայտարարել է, որ մտադիր է Ուկրաինա վերադառնալ սեպտեմբերի 10-ին: Նրա խոսքով՝ նա մտադիր է մտնել երկրի տարածք Լեհաստանի կողմից՝ «Կրակովեց» անցակետով: Այսօր ավելի վաղ հաղորդվել է, որ Սաակաշվիլին հայտարարել է, որ Ուկրաինայի իշխանությունները սադրանքներ են պատրաստում իր դեմ։

«Ես չեմ զարմանա, եթե նրանք առաջիկա օրերին ինձ Անվտանգության դաշնային ծառայության լրտես կամ գեներալ, կամ էլ Պուտինի լավագույն ընկեր հայտարարեն», - ասել է Սաակաշվիլին:

Հուլիսի 26-ին Ուկրաինայի միգրացիոն ծառայությունը հայտնել է, որ երկրի նախագահ Պյոտր Պորոշենկոն Սաակաշվիլիին Ուկրաինայի քաղաքացիությունից զրկելու մասին հրամանագիր է ստորագրել: Ինչպես նշել են Ուկրաինայի նախագահի աշխատակազմում, Վրաստանի նախկին նախագահը զրկվել է քաղաքացիությունից այն ստանալու ժամանակ կեղծ տվյալներ տրամադրելու պատճառով: Նա, մասնավորապես, նշել է, որ քննության տակ չի գտնվում ո՛չ Ուկրաինայում, ո՛չ որևէ այլ պետությունում, սակայն իրականում Սաակաշվիլին հեռակա կարգով կալանավորված է Վրաստանում: