ԱՄՆ դեսպանատունը՝ գնդակահարված պատանդառուի մասին

Armtimes.com-ը Երեւանի քաղաքի Էրեբունի վարչական շրջանում գտնվող «Weekend» բիլիարդ ակումբի տարածքում վնասազերծված Գոռ Հակոբյանի վերաբերյալ մամուլում տարածված տեղեկությունների վերաբերյալ հարցում էր ուղարկել Երեւանում ԱՄՆ դեսպանատուն:

Մենք հարցրել էինք, թե արդյո՞ք Գոռ Հակոբյան արտաքսվել է ԱՄՆ-ից, անդամակցել է «Արմենիա փաուեր» խմբին, ԱՄՆ քաղաքացի էր, թե՝ ոչ: Դեսպանատան մեզ ուղղված պատասխանում ասված. «Իրավապահների ընթացիկ վարույթների վերաբերյալ մեկնաբանություններ անելու իրավասություն մենք չունենք: Տեղեկությունների համար խնդրում ենք դիմել ՀՀ պատկան մարմիններին»:

Armtimes.com-ին մինչդեռ այսօր արդեն հայտնի է դարձել, որ Գոռ Հակոբյանը 1997 թվականին ընտանիքի անդամների հետ մեկնել էր ԱՄՆ մշտական բնակության, իսկ 2008 թվականին ՀՀ քաղաքացու անձնագիր էր ստացել: Այսօր նրա վարձակալած բնակարանում հայտնաբերվել է ատրճանակի փամփշտատուփ՝ լիցքավորված 9 մմ տրամաչափի 3 փամփուշտով: Նույն տրամաչափի փամփուշտ է հայտնաբերվել նաեւ նրա ավտոմեքենայի սրահից։

Օգոստոսի 29-ին Գոռ Հակոբյանը պատանդ էր պահել իր ընկերուհուն՝ 24-ամյա կնոջը, սպառնացել սպանել նրան, ապա ակումբին պատկանող գույքը շպրտել փողոց: Մեկ ժամ տեւած բանակցություններն արդյունք չտալուց հետո իրավապահները դիպուկահարի արձակված կրակոցով վնասազերծել էին նրան: «Էրեբունի» բժշկական կենտրոն տեղափոխվելու ճանապարհին տղամարդը մահացել էր: Էրեբունի ԲԿ էր տեղափոխվել նաեւ 24-ամյա կինը՝ բազմաթիվ վնասվածքներով: Դեպքի առթիվ հարուցվել է քրեական գործ՝ ՀՀ քրեական օրենսգրքի 218 հոդվածի հատկանիշներով (պատանդ պահելը):