Ալիեւին կողոպտել են

Բրիտանական The Guardian-ը հերթական բացահայտումն է արել: Պարբերականը գրում է, որ Ադրբեջանի իշխանությունը 2.9 մլրդ դոլարի գաղտնի ծրագիր է իրագործել՝ նշանավոր եվրոպացիներին վճարելու, շքեղ ապրանքներ ձեռք բերելու և բրիտանական ընկերությունների միջոցով փող լվանալու համար:«Բացահայտված տվյալները ցույց են տալիս՝ Ադրբեջանի ղեկավարությունը, որը մեղադրվում է մարդու իրավունքների բազմաթիվ խախտումների, պարբերական կոռուպցիոն գործարքների և ընտրությունները կեղծելու մեջ, 2012-2014 թվականներին ավելի քան 16.000 գաղտնի վճարում է կատարել:Գումարի մի մասն ուղղվել է քաղաքական գործիչներին և լրագրողներին՝ որպես միջազգային լոբինգի մի մաս, որն ուղղված է եղել երկրի նախագահ Իլհամ Ալիևի դեմ հնչող քննադատությունները դադարեցնելուն, նավթով հարուստ Ադրբեջանը դրական իմիջով ներկայացնելուն: Եվ անկասկած, գումարը ստացողները տեղյակ են եղել, թե որտեղից է գալիս այն: Այն նրանց է հասել գաղտնի երթուղով:Այս բացահայտումները նաև ցույց են տալիս Բրիտանիայի կորպորատիվ հատվածի անկառավարելի համակարգը՝ 7 մլն ֆունտ է ծախսվել Բրիտանիայում շքեղ ապրանքների և մասնավոր դպրոցների վարձավճարների համար:Ադրբեջանի և Ռուսաստանի վճարային համակարգերի միջոցով ներդրված դրամական միջոցներն անցել են բրիտանական ընկերություններ Եվրոպայի առաջատար բանկերից Danske-ի միջոցով, որը վճարումները կատարել է Էստոնիայի իր մասնաճյուղում», գրում է The Guardian-ը:Ադրբեջանն ահռելի գումարներ է ծախսում մի կողմից զենքի, մյուս կողմից լոբբինգի վրա: Արեւմտյան մամուլում վերջին շրջանում պարբերաբար սկանդալային բացահայտումներ են արվում Ադրբեջանի իշխանության եւ մանավանդ Ալիեւների ընտանիքի կոռուպցիոն գործարքների մասին:Հետաքրքիր է, որ այս երկու ուղղությամբ էլ Ադրբեջանը որեւէ հաջողություն չի գրանցել. Պատերազմով հնարավորություն չկա լուծել Ղարաբաղի խնդիրը, իսկ Ադրբեջանի ու Ալիեւների իմիջն օրեցօր ընկնում է թե կոռուպցիոն սկանդալների, թե միջազգային կառույցների զեկույցների, թե արտաքին ֆինանսական պարտավորությունների տեսքով:Ընդ որում, այս իրավիճակը խորանում է նավթի գների նվազման, արդյունահանման սպառման ու Ադրբեջանի տնտեսական իրավիճակի վատթարացմանը զուգահեռ: Ալիեւը հայտնվել է զավեշտալի վիճակում՝ որքան շատ է վճարում լոբբինգի համար, այնքան ավելի է բացահայտվում Ադրբեջանի ու իր դեմքը: Ընդ որում, պարզվել է նաեւ, որ ադրբեջանական փողով հայտնի հետազոտական կենտրոնների ու միջազգային կառույցների մշակած բազմաթիվ նախագծեր չեն ազդել պետությունների քաղաքականության վրա, այդ թվում Ղարաբաղի հարցում:Կա մեկ այլ հանգամանք էլ, որ այս կոռուպցիոն բացահայտումների ուղիղ հետեւանքն է՝ այս ֆոնին ցանկացած պրո-ադրբեջանական ելույթ կամ հրապարակում միջազգային մեդիա-քաղաքական հարթակներում անմիջապես վերագրվելու է կաշառվածությանը եւ կոռուպցիոն սխեմաներին:Ադրբեջանը ոչ մեկին չի հետաքրքրում, բացի նրա փողերից, որը երկրից հանում են այս կամ այն ձեւով: Միայն հայկական քաղաքական դասն է, որ ուզում է տարածք հանձնել Ադրբեջանին:Ի դեպ, հատկանշական է, որ ըստ The Guardian-ի՝ Ադրբեջանական կաշառքը հոսել է նաեւ ռուսական խողովակներով: