Բուհերը կանգնել են տագնապալի իրավիճակի առաջ. ԵՊՀ ռեկտորի ահազանգը

Բուհերը կանգնել են տագնապալի իրավիճակի առաջ և հայտնվում են ֆինանսական փոսում, տարեցտարի դիմորդների թիվը նվազում է, այսօր Ազատություն ռադիոկայանի ֆեյսբուքյան ասուլիսի ժամանակ օգտատերերի հարցերին ի պատասխան ասաց Երևանի պետական համալսարանի ռեկտոր Արամ Սիմոնյանը:
Նա ներկայացրեց թվեր, ըստ որոնց՝ 2014 թվականին Երևանի պետական համալսարան ընդունվել է 3224, 2015 թվականին՝ 3060, 2016 թվականին՝ 2988 ուսանող:
«Հաջորդ տարի սպասվում է էլ ավելի վատ վիճակ, որովհետև այս տարի դպրոցն ավարտել են 20 հազար հոգի, իսկ ԵՊՀ ընդունվել է 2602 հոգի: Ավանդաբար ԵՊՀ գալիս է դիմորդների 1/3-ը: Իսկ մյուս տարի այդ 20 հազարի դիմաց դպրոցը կավարտի ընդամենը 9679 հոգի: Նախ և առաջ դա 12-ամյա կրթության հետևանք է, բացի այդ, ժողովրդագրական խնդիրներ կան երկրում: Եվ, բնականաբար, 9679 շրջանավարտից մի 7000-ը կգան բուհ ընդունվելու, ուրեմն մեր կանխատեսումներով՝ ԵՊՀ կընդունվի ոչ ավելի, քան 1229 հոգի: Համենայնդեպս, վիճակը շատ տագնապալի է լինելու»,- ասաց ռեկտորը:

Նա նշեց, որ բոլոր բուհերն այս ամենի հետևանքով ֆինանսական փոսում կհայտնվեն: Այս իրավիճակն, ըստ Արամ Սիմոնյանի, իրեն զգացնել կտա մի քանի տարի շարունակ: Նա ասաց, որ կանխատեսելով այս իրավիճակն՝ իրենք արդեն սկսել են որոշակի միջոցառումներ իրականացնել: Ծախսերի կրճատում է եղել, նոր աշխատակիցների ընդունման հարցում սահմանափակում է դրվել, եղած աշխատողների թիվը չի կրճատվել, բայց ավելի պակաս վարձատրություն են ստանում:
«Պետք է գոտիներն ամրացնենք, մինչև տեսնենք ինչ է լինում, պետք է անվտանգության բարձիկներ ստեղծենք», հավելեց նա: