Ի՞նչ պատասխան են տալու Վարչապետին, եթե պարզվեց, որ հոսանքն ու գազը թանկ են վաճառել ժողովրդի վրա

shame.am-ը գրում է․

Կառավարության այսօրվա նիստին վարչապետ Կարեն Կարապետյանը շարքային քաղաքացիների համար ուրախալի մի լուր հնչեցրեց՝ հանձնարարական տալով վերանայել գազի և էլեկտրաէներգիայի սակագները սոցիալապես անապահով խավերի համար՝ ի հաշիվ այլ սպառողների: Դրանից հետո վարչապետը Հանրային ծառայությունները կարգավորող հանձնաժողովի նախագահ Ռոբերտ Նազարյանին հարցրեց, թե որքան ժամանակ կպահանջվի մինչև նրանք ներկայացնեն առաջարկությունների փաթեթը, ապա առաջարկվեց քննարկումն այսօր կազմակերպել՝ Լևոն Յոլյանի և սոցապ նախարարի հետ համատեղ:

Հետաքրքիր իրավիճակ է ստացվում: Փաստորեն, նորաշանակ վարչապետը խախտում է քաղաքացիական հասարակության հավասարության սկզբունքը, որը պետք է հիմնարար լինի բոլոր երկրների համար. եթե իհարկե նրա ասածն այն է, որ քաղաքացիների մի մասի վրա ավելացվի սակագների բեռը և դրա հաշվին թուլացվի մյուսներինը։ Սա անընդունելի է. Նյու Յորքում և՛ Դոնալդ Թրամփը, և՛ Հառլենի բոմժը նույն սակագինն են վճարում թե՛ գազի, թե՛ լույսի համար։ Իսկ եթե վարչապետի մտքի իմաստն այն է, որ բեռը դնի խոշոր բիզնեսի վրա, ապա սա ավելի ընդունելի տարբերակ է, բայց չպետք է մոռանանք, որ այն բումերանգով կխփի բոլորիս. ի վերջո, եթե թանկանա գազալցակայանի գազը, ապա դա կանդրադառնա բոլորիս բարեկեցության վրա։ Դե իսկ եթե վարչապետն իրոք տեսնում է էժանացման տարբերակ և ռեալ հնարավորություն, ապա տեսնես հիմա ինչպե՞ս է բացատրելու այս նոր հրաշագործությունը նույն Ռոբերտ Նազարյանը, ով մեկ տարի առաջ երդվում էր, որ բացառվում է նույնիսկ մեկ լումայով գազն ու էլեկտրաէներգիան էժանացնելու հնարավորությունը և ով այսօր պիտի Կարապետյանի հետ քննության առնի այդ կարևորագույն հարցը։