Ադրբեջանն սպառնում է

«Ադրբեջան» պետական պաշտոնաթերթը հոդված է հրապարակել, որում բացահայտ սպառնալիքներ կան Արեւմուտքի հասցեին, Ալիեւի դեմ արշավի կապակցությամբ:
Հոդվածում նաեւ հետաքրքիր շեշտադրումներ կան: Պնդվում է, որ Ալիեւն ու Թրամփը լավ հարաբերություններ ունեն, իսկ Ալիեւի դեմ արշավն արվում է օբամայական իներցիայով:
Բացի այդ, հոդվածում ասվում է, որ եթե Մագնիտսկու ակտը տարածվի Ադրբեջանի վրա, Բաքուն կարող է վերանայել Արեւմուտքի հետ ռազմավարական գործընկերությունը: Խոսքը նախեւառաջ խաղաղապահ առաքելություններին մասնակցության մասին է:
Հիշեցնենք, որ երեկ ԱՄՆ Կոնգրեսում առաջարկվել է պատժամիջոցներ մտցնել Ադրբեջանի ու Թուրքիայի դեմ: Ըստ ամենայնի, Ադրբեջանը սպասում է Կոնգրեսի համապատասխան որոշմանը: Իսկ դա նշանակում է, որ կարող են սառեցվել Ալիեւի հաշիվները եւ կալանք դրվի ունեցվածքի վրա:
Իսկ ամենածիծաղելին այն է, որ Ադրբեջանը սպառնում է ձերբակալել ավելի շատ ընդդիմադիրների ու արեւմտամետ գործիչների: Հոդվածում ասվում է, որ իշխանությունները համբերատար հետեւում էին արեւմտամետ մի շարք լրագրողների ու գործիչների գործողություններին, քանի դեռ նրանք չեն սկսել ցնցել պետության հիմքերը, եւ ստիպված են եղել ձերբակալել նրանց: Եւ եթե Ադրբեջանի դեմ արշավը շարունակվի, ապա նման քայլերը կշարունակվեն, ասվում է հոդվածում:
Փաստորեն Բաքուն Արեւմուտքին սպառնում է իր իսկ քաղաքացիների ձերբակալություններով, ովքեր զարգացման արեւմտյան ճանապարհի կողմնակիցներ են: