Հաստատվել է Արսեն Ոսկանյանի մահը

Կոլումբիայում ՌԴ քաղաքացի Արսեն Ոսկանյանի մահվան մասին տեղեկությունը հաստատվեց: Նա կորել էր 2016 թվականի նոյեմբերին: Ենթադրաբար նա մահացել է գերությունից փախչելու փորձի ժամանակ: Այս մասին հայտնում է Կոլումբիայում ՌԴ դեսպանատունը Facebook-ի իր էջի միջոցով:

«Թե ինչ է տեղի ունեցել այդ ողբերգական օրը (խոսքն այս տարվա ապրիլի մասին է)՝ կան տարբեր վարկածներ: Ակնհայտ է մի բան՝ Արսեն Ոսկանյանը մահացել է: Ենթադրաբար՝ գերությունից փախչելու փորձի ժամանակ»,- ասված է դեսպանատան հաղորդագրությունում, հայտնում է ՏԱՍՍ-ը:

Ավելի վաղ հայտնի է դարձել, որ դեսպանատունը ստուգում է ապստամբների կողմից իրենց մոտ գերի պահվող Արսեն Ոսկանյանի սպանության մասին տեղեկությունը:

Reuters գործակալության տեղեկություններով՝ Կոլումբիայի «Ազգային ազատագրական բանակ» ապստամբական խմբավորումը հայտարարել է, որ իր մոտ գերի պահվող Ոսկանյանը սպանվել է փախուստի փորձի ժամանակ 2017 թվականի ապրիլին: Ավելի վաղ ապստամբները հայտարարել էին, որ պատանդին հաջողվել է փախչել:

Գործակալության համաձայն՝ տղամարդը գերի է ընկել 2016 թվականի նոյեմբերին, երբ փորձել է անօրինական ճանապարհով Հայաստան տեղափոխել հազվագյուտ թունավոր գորտեր:

Դեսպանատան հաղորդագրության համաձայն՝ Ոսկանյանի մասին տեղեկության ստուգման ընթացքում դիվանագիտական գերատեսչությունն օգտագործել է «բոլոր հնարավոր ալիքները՝ ինչպես պաշտոնական, այնպես էլ ոչ պաշտոնական»: Սակայն նրա մահվան հստակ պատճառն այդպես էլ չի հաջողվել պարզել:

Դեսպանատունը հայտնել է, որ սերտ կապի մեջ է Կոլումբիայի համապատասխան գերատեսչությունների, միջազգային կառույցների, ինչպես նաեւ Ոսկանյանի հարազատների հետ՝ նրա մարմնի փոխանցումն իրականացնելու համար: