«Նախագահը հրաժեշտի խոսքի պես մի բան է ասել»

News.am-ը գրում է․

«Նախագահ Սերժ Սարգսյանի` նոր վարչապետին ներկայացնելու ժամանակ հնչեցրած ելույթն ավելի շատ նման էր հրաժեշտի խոսքի»: Այս մասին այսօր` սեպտեմբերի 16-ին, լրագրողների հետ հանդիպմանն ասաց Գերագույն խորհրդի նախկին պատգամավոր Վիգեն Խաչատրյանը:

«Սերժ Սարգսյանը ինչպես ներկայացրեց նոր վարչապետին` բարեփոխումների մեծ առաջնորդ` սա ավելի շատ նախագահի հրաժեշտի խոսքի էր նման, քան նոր վարչապետի ներկայացման»,-ասաց նա:

Վիգեն Խաչատրյանը նշեց, որ կառավարության փոփոխությունը ճիշտ որոշում էր` տարիներ շարունակ երկրում կային մարտահրավերներ, խնդիրներ, որոնք այդպես էլ չկարողացավ լուծել Հովիկ Աբրահամյանի կառավարությունը:

«Բավարար տեղեկատվություն, թե ինչու վարչապետը հրաժարական տվեց, այդպես էլ չտրվեց հանրությանը, այստեղից էլ սկսվում է ենթադրությունների դաշտը: Ճիշտ քայլ է արվել, նպատակները, մարտահրավերները, որոնք կան, տարիներ շարունակ չեն լուծվում, գնալով երկրի վիճակն ավելի մտահոգիչ է դառնում: Այս առումով կարծում եմ, որ պետք էին փոփոխությունները: Մենք կանգնած ենք շատ կարեւոր իրադարձության շեմին` ընտրությունների, տեսնում ենք բոլոր այն քաղաքական ուժերին, որոնք հավակնում են մասնակցել ընտրություններին եւ գալ իշխանության: Այս կամ այն չափով ինչ-որ ուժ համակիրներ ունի, սակայն, չկա մի քաղաքական ուժ, որը հասարակության շրջանում վստահություն է ներշնչում: Այս առումով նոր վարչապետի այսպիսի ընտրությունը վկայում է, որ քաղաքական ուժ, որն ունի ռեսուրս, չունենք»,-ասաց նա:
Վիգեն Խաչատրյանը նշեց, որ կառավարության կազմը եւս շատ կարեւոր է, պետք է լինի մի թիմ, որն ունի ընդհանուր, միասնական նպատակներ: ԱԺ ՀՀԿ խմբակցության պատգամավոր Սուքիաս Ավետիսյանն էլ նշեց, որ ՀՀ նոր վարչապետ Կարեն Կարապետյանն այն քաղաքական գործիչներից է, որը կկարողանա լուծում տալ այն խնդիրներին, որոնք այսօր առկա են երկրում:
«Եվ քաղաքական ուժերին, եւ նախորդ վարչապետին, եւ նախագահին, չէին բավարարում երկրի տնտեության զարգացման, հասարակության բարեփոխումների տեմպերը: Շատ դանդաղ քայլերով առաջ գնալը չի բավարարում մեզ: Մենք տարբեր խնդիրներ ունենք, որոնք պետք է լուծվեն: Կարեն Կարապետյանն այն մարդկանցից է, որը ի զորու է իր վրա վերցնել բեռ եւ ավելի արագ տեմպերով խթան հանդիսանալ ծառացած խնդիրների լուծմանը: Լավ է, որ հասարակության շրջանում կա հավատ նոր վարչապետի նկատմամբ», -ասաց նա: