Ո՞վ է լինելու հաջորդ զոհը. Ալավերդու Վահագի երեք մտիմներն սպանված են

Newsbook.am-ում կարդում ենք․

Վերջին ամսիներին Հայաստանում այնքան են շատացել սպանություններն ու տարբեր կրմինալ խմբավորումների բախումները, որ արդեն անեկդոտ է դրվել շրջանառության մեջ՝ իրավապների վրա «պլան են դրել օրը մեկ-երկու սպանություն զեկուցել»: Իրականում իրավիճակն ահագին ողբերգական ու վտանգավոր է, որովհետև գործ ունենք ավարտվող ճակատագրերի և հանրապետությունում քրեական իրավիճակի բացարձակ անվերահսկելի լինելու հետ: Թեման ընդարձակ է ու ընդգրկում է բազմաշերտ իրողություններ, և այս իրավիճակում մնում է հուսալ, որ մոտ օրերս Սերժ Սարգսյանը հանդես չի գա հրապարակային ելույթով՝ համոզմունք հայտնելով, թե այս ամենը (ինչպես, օրինակ, ընտրությունների կեղծումը) ազգային մենթալիտետի տիրույթից է:   

Երեկ հերթական սպանությունն է գրանցվել մայրաքաղաքի սրտի մեջ: Ժամը 13։45-ի սահմաններում Կենտրոն և Նորք-Մարաշ վարչական շրջանների քննչական բաժնում ահազանգ է ստացվել, որ Երևան քաղաքի Վերնիսաժի մոտ հնչել են կրակոցներ, կան տուժածներ։ Պարզվել է, որ Հանրապետության 48 հասցեում գտնվող «Թուֆենկյան» հյուրանոցի մոտ՝ 13:30-ի սահմաններում, հնչել են կրակոցներ, որի հետևանքով ստացած հրազենային վնասվածքներից մեկ անձ՝ 1974 թ. ծնված Գագիկ Մոսինյանը, մահացել է, ևս մեկը՝ 1978թ. ծնված Վահագն Աբգարյանը, հրազենային վնասվածքներով տեղափոխվել բժշկական կենտրոն։ Դեպքի վայրի զննությամբ հայտնաբերվել է «AK 74» տեսակի մեկ ինքնաձիգ, «Մակարով» տեսակի մեկ ատրճանակ, պարկուճներ։ Հանցագործները դիմել են փախուստի. կա մեկ զոհ և մեկ վիրավոր:

Վիրավորը 38-ամյա Վահագն Աբգարյանն է, որն Ալավերդիում բավականին հարգված անձնավորություն է։ Նրան է պատկանում «Սանահին բրիջ» հյուրանոցը։ Վահագնի ընտանիքը Լոռու մարզում ճանաչում վայելող ընտանիքներից է. ծնողները՝  մտավորականներ են, որոնք երեկ մամուլից են տեղեկացել կատարվածի մասին, ու միայն իրենց որդու վիրահատության ավարտին են հասել Երևան: Վահագնի նկատմամբ վերջին տարիներին անընդհատ մահափորձեր են պլանավորվել, որոնց, ի դեպ, երեկ անդրադարձել է Հատուկ քննչական կոմիտեն կիսատ-պռատ հաղորդագրության տեսքով: Մինչդեռ այն լրագրողները, որոնք առիթ են ունեցել այդ դեպքերի լուսաբանման շրջանակներում չսահմանափակվել պաշտոնական կցկտուր հաղորդագրություններով, ահագին բան գիտեն այդ դեպքերի նախաքննությունների, բուն քննությունների և դատաքննությունների մասին:

Մահափորձ 1-ին դրվագ

Վահագն Աբգարյանի նկատմամբ առաջին մահափորձն իրականացվել է 2015 թվականի հոկտեմբերի 11-ին, երբ Ախթալայի կամրջի վրա ավտոմատից արձակված կրակահերթը կանգնեցրել է այն ժամանակ 36-ամյա Վահագնի զրահապատ ավտոմեքենան։ Չարագործը կրակահերթի տակ է առել Աբգարյանին պատկանող «Համեր» մակնիշի և նրա ընկերոջ` Ա. Մնացականյանին պատկանող «Նիսան Տիանա 280 JK» մակնիշի ավտոմեքենաները, հետապնդել է նրանց, ապա իր մոտ եղած ինքնաձիգից հանդիպակաց ուղղությունից բազմաթիվ կրակոցներ էր արձակել ընթացքի մեջ գտնվող նշված երկու ավտոմեքենաների վրա։ Սակայն հանցագործությունն ավարտին չէր հասել, քանի որ «Համեր»-ը եղել էր զրահապատ, իսկ «Նիսան Տիանա 280 JK» մակնիշի ավտոմեքենան թաքնվել է «Համեր»-ի հետնամասում»։  «Համերի» ուղղությամբ կրակահերթի ժամանակ Աբգարյանը մեքենայի մեջ չի եղել։ Փոխարենը մեքենայում են եղել նրա չորս ընկերները, որոնք չեն տուժել միայն այն պատճառով, որ մեքենան զրահապատ է եղել։ Այդ գործը դեռ չէր հասել դատաքննության փուլին, երբ հայ հասարակությունը տեղեկացավ հերթական կրակոցների մասին: Ի դեպ, ինչպես երեկվա չարագործները, այնպես էլ 2015 թ. քիլլեր Անտոնյանը սպանության փորձը կատարել էր՝ երկու կամ ավելի անձանց նկատմամբ՝ շատերի կյանքի համար վտանգավոր եղանակով: Հատուկ քննչական կոմիտեն, չգիտես ինչու, երեկ տարածած հաղորդագրության  մեջ չի շոշափել մահափորձի պատվիրատուների անունները, որոնք «Լալվար» քարի արտադրամասի սեփականատերերն են՝ երկու եղբայրներ՝ Տարոն և Արթուր Աբգարյանները:(Մահափորձ իրականացնող քիլլեր Անտոնյանն ու նրա վարորդը եղել են «Լալվար» քարի արտադրամասի աշխատակիցներ): Ի դեպ՝ այդ դեպքերից հետո Տարոնն ու Արթուրը շտապել են լքել հանրապետությունը։ Ալավերդիում այսօր ապրում է միայն նրանց մայրը։

Մահափորձի 2-րդ դրվագ

2016 թվականի լույս մայիսի 19-ի գիշերը Ալավերդիում կրակոցներից սպանվեցին  քաղաքում Էդուարդ Պողոսյանն ու Վարդան Ավագյանը: Չարագործը 1984 թ. ծնված Վարդան Փիրուզյանն էր, ում նկատմամբ հայտարարվեց հետախուզում:  Մայիսյան կրակոցների արդյունքում սպանված տղաները եղել են երեկ վիրավորված Վահագն Աբգարյանի մտերմագույն ընկերները։ Հիվանդանոցում մահացած Էդուարդ Պողոսյանը (Առինջից) միաժամանակ եղել է Վահագն Աբգարյանին պատկանող հյուրանոցի տնօրենը։ Ի դեպ՝ հետախուզվող անձնավորությունը դեռ հայտնաբերված չէ:

Մահափորձի 3-րդ դրվագ

Ուղիղ 4 ամիս առաջ՝ հունիսի 13-ին, Ալավերդի քաղաքում գտնվող ծաղկի սրահներից մեկում սպանվեց մինչ օրս հետախուզվող Վարդանի եղբայրը՝  Կամո Փիրուզյանը (ծնված 1978թ): Բազմաթիվ կրակոցներ արձակելով նրա ուղղությամբ՝ այսօր անազատության մեջ գտնվող երիտասարդը սպանվածին էր մոտեցել ու ոտքերով հարվածել  էր տուժողի մարմնի տարբեր մասերին: 

Մահափորձի 4-րդ դրվագ

Երեկ սպանված Գագիկ Մոսինյանը (ծնված 1974 թ.) Վահագն Աբգարյանի ընկերներից է, դարձյալ մտերմագույն: Ըստ էության երրորդ անգամ արդեն Աբգարյանը ինչ-որ հրաշքով է ողջ մնում: Առաջին անգամ նա մեքենայի մեջ չէր, իսկ նրա չորս ընկերները չէին տուժել մեքենայի զրահապատ լինելու հանգամանքով պայմանավորված, երկրորդ անգամ՝ սպանվել էին նրա ընկերները,  որոնց հետ այդ պահին չլինելը պատահականության հետևանք էր, իսկ երրորդ անգամ արդեն՝ էլի հրաշքով ողջ է մնում՝ ականատես լինելով ընկերոջ սպանությանը:

Հ.Գ. Ալավերդիում այս պատմությունը սկիզբ է առել քաղաքապետի ընտրությունների ժամանակ: Այս ընթացքում սպանվել են Վահագն  Աբգարյանի երեք ընկերները, ևս մեկը՝ հակառակորդ թիմից: Պատվիրատուներն ազատության մեջ շրջում են, կատարողներից որոշներն էլ մինչ այսօր հետախուզվում են, իսկ Քննչական կոմիտեն ի գիտություն ազգի՝ հայտարարում է, թե բոլոր սպանությունները բացահայտված են: Իրո՞ք: Դե որ էդպես է՝ ինչո՞ւ չեն հրապարակվում պատվիրատուների անունները, և ինչո՞ւ են շարունակվում սպանությունները՝ օրը ցերեկով, հանրային նշանակության վայրերում, մարդկանց աչքի առաջ: Ի՞նչ է  սպասվում Վահագն Աբգարյանին: Ո՞վ է լինելու հաջորդ զոհը: