Դաշնակներն՝ ընդդեմ վարչապետի

shame.am-ը գրում է․

Երեկվա միջադեպը, երբ կառավարության նիստի ժամանակ վարչապետ Կարեն Կարապետյանը նկատողություն արեց դաշնակ նախարար Արծվիկ Մինասյանին և հայտարարեց, որ նրան չի հավատում, խիստ վշտացրել ու զայրացրել է ՀՅԴ-ականներին: Այս հրապարակային անվստահությունից ու ծաղրուծանակից դառնացած դաշնակներն այսօր շտապեցին հակահարված հասցնել վարչապետին: Եվ ԱԺ ճեպազրույցների ժամին ՀՅԴ խմբակցության ղեկավար Արմեն Ռուստամյանը հնչեցրեց իրենց արձագանքը՝ Կարեն Կարապետյանին անվանելով շոումեն: «Զերծ մնանք շոուների տրամաբանությանը համապատասխանող ինչ-որ տպավորություն ստեղծող քայլերից, որոնք շատ կարճաժամկետ կյանք կարող են ունենալ»,-ասաց նա և ապա հավելեց. «Կառավարությունն այն տեղը չի, որտեղ վարչապետը պետք է հավատա կամ չհավատա, եթե մի բան կա, որ տեսնում ես, էլ դրա հավատալը ո՞րն է։ Չկա՞, ուրեմն առավել ևս հավատալու խնդիր չկա: Կոնկրետ կառավարություն է, որտեղ կոնկրետ գործեր պիտի կատարվեն, և այդ գործերը կամ կան, կամ չկան»:

Նորանշանակ վարչապետին վարվեցողության և ղեկավարման էթիկայի մասին դասեր հնչեցնող Ռուստամյանի ձայնը տաք տեղից է գալիս: Տեղեկությունն այն մասին, որ երեք դաշնակ նախարարների պորտֆելներին ձեռք չեն տալու, լրացուցիչ համարձակություն է ներշնչել նրան, այլապես ոչ մի գնով չէր համարձակվի դիտողություն անել Կարապետյանին՝ հրաշալի հասկանալով, թե հետևանքն ինչպիսին կլիներ: Բայց նույնիսկ այս պարագայում դաշնակները հասկանում են, որ համագործակցության համաձայնությամբ պաշտպանված լինելու փաստը արժեզրկում է իրենց ընդունակությունների հատվածը և այդ իսկ պատճառով էլ հիմա սկսել են աղմկել, թե իբր իրենք առաջին հերթին իրենց գործով են պաշտպանված: Բայց քանի որ հասարակությանը դեռևս անծանոթ է որևէ ռեալ գործ, որն արվել է դաշնակների կողմից, ապա պետք է ենթադրել, որ շատ շուտով վարչապետը կտա նրանց պատասխանը հատկապես գործունեության դաշտում: