Հակադեպրեսանտների վտանգավոր հետևանքների մասին

Մակմասթերի համալսարանի (Կանադա) գիտնականները նախազգուշացնում են, որ հակադեպրեսանտների պարբերաբար գործածությունը կարող է բարձրացնել վաղաժամ մահվան հավանականությունը: Մասնագետները հայտնաբերել են, որ դեպրեսիաներից (ընկճախտ) տառապող այն մարդիկ, որոնք չէին տառապում սրտի հիվանդություններից, 33%-ով ավելի հաճախ էին մահանում որևէ պատճառով, եթե ընդունում էին հակադեպրեսանտներ, քան նրանք, ովքեր չէին ընդունում նման դեղամիջոցներ:

Գիտնականները կարծում են, որ հակադեպրեսանտներն ավելի շատ վնասում են օրգանիզմին, քան օգուտ են տալիս, ուստի դրանց գործածությունը հարկավոր է խիստ սահմանափակել: Գիտնականները նման եզրահանգման են եկել նախկինում անցկացված 17 հետազոտության արդյունքներն ու 380000 մարդու վրա հակադեպրեսանտների ունեցած ազդեցությունը վերլուծելուց հետո:

Սկզբնական վերլուծությունը ցույց է տվել, որ հակադեպրեսանտներ ընդունողների շրջանում մահվան հավանականությունը բարձր է միայն 9%-ով, սակայն հետագա ուսումնասիրությունների ընթացքում գիտնականներն առանձնացրել են ուսումնասիրվողների տվյալներից այն մարդկանց տվյալները, որոնք տառապում էին սրտանոթային հիվանդություններից: Այս դեպքում գիտնականները նկատել են, որ սրտանոթային հիվանդություններից չտառապող, բայց հակադեպրեսանտներ ընդունող հիվանդների շրջանում մահվան հավանականությունը 33%-ով ավելի բարձր էր, քան այն հիվանդների շրջանում, որոնք չէին ընդունում հակադեպրեսանտներ:

Մասնագետների կարծիքով՝ սա պայմանավորված է նրանով, որ հակադեպրեսանտներն օգնում են ջրիկացնել արյունն ու նվազեցնել դրա մակարդելիությունը, ինչը կարող է օգտակար լինել սրտի հիվանդություններից տառապողների համար, սակայն վտանգավոր է մյուսների համար, քանի որ բարձրացնում է ներքին արյունահոսության առաջացման հավանականությունը: