«Սակագները հնարավոր է նվազեցնել»

«ՉԻ»-ն գրում է․

Նորանշանակ վարչապետ Կարեն Կարապետյանը կառավարության նիստում նախարարներին հանձնարարել է համատեղ քննարկել եւ առաջարկություններ ներկայացնել գազի եւ էլեկտրաէներգիայի սակագնային քաղաքականության վերանայման մասին։ «Մաքսիմալ նվազեցնել սակագինը սոցիալապես անապահով խավերի համար՝ ի հաշիվ այլ սպառողների՝ տրամաբանական է, ապահովել սակագների խթանիչ ազդեցությունը բիզնեսի համար՝ հատկապես գյուղատնտեսության եւ վերամշակող ճյուղերի համար։

Հանձնարարականը նույնպես կձեւակերպվի, ժամկետները կարվի։ Այս ամենը պետք է անել ոչ ի հաշիվ բյուջեի, պետք է անել ի հաշիվ տնտեսվարող սուբյեկտների, որոնք որ այդ ծառայությունները մատուցում են»,- ասել է նա։

Նկատենք, որ ՀԾԿՀ նախագահ Ռոբերտ Նազարյանն ու էներգետիկայի ու բնական պաշարների նախարար Լեւոն Յոլյանը հենց երեկ կասկածի տակ են դրել այդ հանձնարարականի իրագործման հնարավորությունը։

ՀԾԿՀ նախագահ Ռոբերտ Նազարյանը կառավարության նիստում վարչապետին առաջարկել է. «Կխնդրեմ, որպեսզի ընդունեք որոշակի սկզբունքներ, միասին փորձենք հասկանալ ինչ ճանապարհով ենք գնում, որից հետո ես Ձեզ ժամանակն ավելի հստակ կասեմ, որովհետեւ խնդիրներ կան, որ պետք է մինչեւ վերջ հասկանալ, որ սխալ ուղղությամբ չգնանք»։Իսկ Լեւոն Յոլյանն էլ լրագրողների հետ զրույցում է ասել. «Հուսով եմ, որ սակագինը կիջեցվի։ Բայց դուք գիտեք, որ ընդամենը մեկ ամիս առաջ սակագինը վերանայվել է։ Հիմա մենք զարգացումների մեջ ենք»։

Ռոբերտ Նազարյանի դեպքում ամեն ինչ պարզ է. ի սկզբանե նա փորձել է հանդես գալ «Գազպրոմի» ու ՀԷՑ-ի փաստաբանի դերում, դեր` որտեղ ՀԾԿՀ նախագահն այս տարիների ընթացքում իրեն բազմիցս է «արդարացրել»։Էներգետիկայի նախարարն էլ իր հերթին է այս հարցում թերահավատ գտնվել` մատնանշելով, որ մոտ մեկ ամիս առաջ էր սակագնային փոփոխություն տեղի ունեցել։

Իրականում ե՛ւ էլեկտրաէներգիայի, ե՛ւ գազի սակագները նվազեցնելու հնարավորություններ կան. այդ մասին խոսվել է բազմիցս։ Այդ մասին դեռ մարտ ամսին խոսել էր Հայ Ազգային Կոնգրեսը` ներկայացնելով սակագների նվազեցման ուղիները։ Սակայն հարց է` իշխանությունները կկարողանա՞ն գնալ այդ քայլին, եւ բացի այդ` ՀԷՑ-ն ու «Գազպրոմն» արդյոք կհամաձայնվե՞ն դրան։ Բանն այն է, որ էլեկտրաէներգիայի եւ գազի սակագների նվազեցումն իր հերթին կբերի բյուջետային եկամուտների էական կրճատման։ Մինչդեռ այսօր Հայաստանում բյուջեի եկամուտների հավաքագրումն ինքնին խնդիր է։ «Կար տեղեկություն դեռեւս մայիս ամսին, որ առաջարկվել էր դեռեւս նախորդ կառավարությանը՝ գազի գինն իջեցնել, որն արվել էր «Գազպրոմի» կողմից, եւ իջեցնել՝ մինչեւ 100 դրամ հասցնել, այսինքն՝ մինչեւ 30 տոկոս։ Նախորդ կառավարությունը մայիսին այդ համաձայնությունը չի տվել, որովհետեւ դա նշանակում էր՝ բյուջետային եկամուտների էական կրճատում։ Հիմա հնարավորություն կլինի, ես կարծում եմ՝ այս կառավարությունը կօգտագործի։ Այդպիսի մի նվեր մեզ կմատուցվի, դրանով կփորձեն մեզ ցույց տալ, թե՝ տեսեք, կառավարությունն իր ժողովրդի մասին մտածում է, դրա հետ կապված՝ չի բացառվում, որ էլեկտրաէներգիայի գինն էլ նվազի»,- կարծում է ՀԱԿ վարչության անդամ Վահագն Խաչատրյանը։

«ՉԻ» հետ զրույցում ԱԺ ՀԱԿ խմբակցության քարտուղար Արամ Մանուկյանը նշեց, թե սակագների նվազեցման իրական հնարավորություններ կան։ «Հնարավորություններ կան, պարզապես` այդ խնդիրը լուծելու համար քաղաքական կամքն է պակաս։ Եթե կարողանա լուծել այդ հարց, ապա կշահի ժողովուրդը, միաժամանակ կապացուցվի մեր ասածը, որ հնարավոր է գազի ու էլեկտրաէներգիայի սակագները 25 տոկոսով նվազեցնել։ Հիշում եք` մենք փաստարկված ներկայացրել ենք, որ կա դրա հնարավորությունը։ Մնում է` ցանկանա եւ կարողանա փորձի։ Եթե կարողանա փորձել` արդյունքը երաշխավորված է»,- ասաց նա։