Սաշիկ Սարգսյանի Մերսեդեսն ու թիկնազորի ջիպը` ԱԺ տարածքում. ՏԵՍԱՆՅՈՒԹ

Armtimes.com-ի տեղեկություններով՝ քիչ առաջ Ազգային ժողովի նախագահ Արա Բաբլոյանին է այցելել Սերժ Սարգսյանի եղբայրը`Սաշիկ Սարգսյանը: Նրանց հանդիպումը տեւել է մոտ մեկ ժամ:

Armtimes.com-ն ԱԺ նախագահի աշխատասենյակի մուտքի մոտ ֆիքսել է մեքենաներ, որոնք ըստ որոշ տեղեկություններ սպասարկում են Սերժ Սարգսյանի եղբորը: ԱԺ նախագահի խորհրդավոր հյուրի դուրս գալու ժամանակ, սակայն Ազգային ժողովի անվտանգության աշխատակիցներն հիշեցին, որ այդ հատվածում անվտանգության նկատառումներով պայմանավորված տեսանկարահանում չի թույլատրվում եւ պահանջեցին, որ հեռանանք նշյալ վայրից:

Armtimes.com-ն ԱԺ լրատվության պատասխանատու Արսեն Բաբայանից հետաքրքրվեց, թե արդյո՞ք Սաշիկ Սարգսյանն այցելել է ԱԺ նախագահին եւ ո՞րն է եղել այցի նպատակը:

«Ազգային ժողովի նախագահի մոտ կարող է հազար ու մեկ մարդ գալ, որը միշտ չէ, որ մեկնաբանության ենթակա է: Մենք մեկնաբանում ենք միայն այն լուրերը, որոնք գտնում ենք, որ անհրաժեշտ է: Եթե մամուլի հաղորդագրություն չենք տարածում, ուրեմն մեկնաբանելու անհրաժեշտություն չենք տեսնում»,- armtimes.com-ին փոխանցեց Բաբայանը:

Հետաքրքիրն այն է, որ ԱԺ նախագահին այցելած Սաշիկ Սարգսյանն իր մեքենայով մուտք էր գործել Ազգային ժողովի տարածք, ինչը շատերի համար անթույլատրելի է: Բաբայանը սրա վերաբերյալ ասաց, որ թույլատրելի է մեքենայով մտնել ԱԺ տարածք:

Հաջորդ հարցին, թե ինչու նշյալ տարածքում չի կարելի նկարահանում իրականացնել, Բաբայանն ասաց.

«Այո, օրինական է`անվտանգության կանոնակարգ է: Այն ուժի մեջ է 2004 թվականից»,-եզրափակեց ԱԺ լրատվության պատասխանատուն: