Երբ են տեղի ունենալու ավարտական քննությունները

Կրթության և գիտության նախարար Լևոն Մկրտչյանն այսօր Կառավարության գործունեության մեկամյա աշխատանքներն ամփոփեց, նախ ներկայացնելով հանրակրթության որոտում կատարված փոփոխությունները:

Նախարարի խոսքով՝ 2016-2017 ուստարվա ուսումնական պլաններում են փոփոխություններ եղել` բեռնաթափելով 12-րդ դասարանի երկրորդ կիսամյակի ուսումնական ծրագիրը` սովորողների ընտրությանը թողնելով նախընտրելի 3 առարկաներ:

Նախարարը տեղեկացրեց, որ այս տարի առաջին անգամ 12-րդ դասարանի ավարտական քննությունները տեղի կունենան դեկտեմբերի վերջին, իսկ ընտրված 3 առարկաների միասնական քննությունները` հունիսին:

Մշակվել են հանրակրթության պետական կրթակարգը, առարկայական չափորոշիչները և ուսումնական ծրագրերի վերանայման հայեցակարգը: «Ազգային կրթակարգի» նախագիծն ավարտական փուլում է գտնվում:

Նախարարն անդրադարձավ ՀՀ կառավարության որոշմամբ հաստատված «Արարատյան բակալավրիատի կրթության գերազանցու­թյան ազգային ծրագրին», որը միջազգային որակավորում է ստացել, մասնավորապես Մեծ Բրիտանիայի կողմից: Առաջին փուլը կմեկնարկի մարզային ավագ դպրոցներից:

ՀՀ կառավարություն է ներկայացվել «ՀՀ կրթության զարգացման 2017-2025թթ. պետական ծրագիրը հաստատելու մասին» ՀՀ օրենքի նախագիծը, որտեղ սահմանվել են կրթության զարգացման նպատակները, գերակայությունները և գործողությունների շրջանակը:

Կարևորվել է էլեկտրոնային կրթության դերը: Ըստ նախարարի՝ գյուղական դպրոցների և էլեկտրոնային կրթության զարգացման շրջանակում կազմակերպվել են փորձնական տեսադասեր` մարզային դպրոցների մասնակցությամբ: Ընտրվել են հանրապետության 10 առաջատար դպրոցներ, որոնք պատրաստ են օժանդակել աջակցության կարիք ունեցող ուսհաստատություններին: Հեռավար և էլեկտրոնային կրթության համար ընտրվել է առավել արդյունավետ համարվող առարկայախումբը՝ «Ինֆորմատիկա», «Քիմիա», «Ֆիզիկա», «Կենսաբանություն», «Աշխարհագրություն» և օտար լեզուներ:

Մշակվել է հանրակրթական դպրոցում ֆինանսական և տնտեսագիտական կրթության ապահովմանն ուղղված քայլերի ժամանակացույց՝ նոր ուսումնական տարվանից ծրագիրը սկսելու պարտադիր պայմանով:

Ստեղծվել է օտար լեզուների դասավանդման հայեցակարգի մշակման աշխատանքային խումբ` անգլերենի, ֆրանսերենի, ռուսերենի, գերմաներենի ենթախմբերով: Հայեցակարգի մշակման նպատակը հանրակրթական դպրոցների սովորողների օտար լեզուների տիրապետման մակարդակի բարձրացմանը նպաստելն է:

Հայաստանում ներառական կրթություն իրականացնող դպրոցների թիվը 2016թ. ավելացել է 78-ով՝ դառնալով 260 հանրակրթական ուսումնական հաստատություն, որոնցում ընդգրկված է շուրջ 6700 երեխա:

«Տեղեկատվական տեխնոլոգիաներ», «Հեռահաղորդակցության հիմունքներ» և «Միկրոէլեկտրոնիկա» առարկաները ներդրվել են ևս 5 ավագ դպրոցում: Անցկացվել են դպրոցականների հանրապետական օլիմպիադաներ հանրակրթական 16 առարկայից, որոնց մասնակցել է շուրջ 1460 սովորող, իսկ միջազգային օլիմպիադաներին Հայաս­տանը թիմային մասնակցություն է ունեցել «Մաթեմատիկա», «Ֆիզիկա», «Քիմիա», «Ինֆոր­մա­տի­կա», «Աստղագիտություն» «Կենսաբանություն» և «Աշխարհագրություն» առարկաներից՝ շահելով 15 մեդալ` 1 ոսկի, 3 արծաթ և 11 բրոնզ:

«Կայուն դպրոցական սնունդ» ծրագրի շրջանակում 2016 թ-ին ՀՀ Վայոց ձորի, Սյունիքի և Արարատի մարզերի բոլոր հանրակրթական դպրոցների տարրական դասարանների աշակերտներին տրամադրվել է դպրոցական նախաճաշ: Ծրագրում ընդգրկված է 23014 աշակերտ: