ԱՄՆ-ն սկսեց պատժամիջոցների գործընթացը Ռուսաստանի դեմ

Լրագիր / Դոնալդ Թրամփը պետքարտուղար Ռեքս Թիլերսոնին նշանակել է մեկ ամիս առաջ Ռուսաստանի դեմ ընդունված պատժամիջոցների մասին օրենքի կատարող: Օրենքը ենթադրում է «օրենքի ուժի մեջ մտնելուց ոչ ուշ քան, քան 180 օրում ֆինանսների նախարարը ազգային հետախուզության տնօրենի եւ պետքարտուղարի հետ միասին Կոնգրեսի համապատասխան հանձնաժողովին պետք է ներկայացնի մանրամասն հաշվետվություններ Ռուսաստանի առաջատար քաղաքական գործիչների մասին, ներառյալ նրանց «մոտիկությունը» իշխող վարչակարգին եւ անձնական կարողության չափը, նրանց կապերը Վլադիմիր Պուտինի եւ ՌԴ իշխող էլիտայի հետ, այդ անձանց կոռումբացվածության մակարդակը, նրանց եկամուտների աղբյուրների գնահատումը, այդ թվում ընտանիքի անդամների ակտիվները, ներդրումները, այլ բիզնես շահերը, ինչպես նաեւ տեղեկատվություն օֆշորների մասին, ՌԴ սահմաններից դուրս այդ անձանց բիզնես կապերի բացահայտումը»:
Հայտնի չէ, թե Պուտինի հետ կապված եւ կոռումպացված անձանց դեմ ինչ պատժամիջոցներ են կիրառվելու, սակայն Ռուսաստանում արդեն հասկանում են, որ ամերիկյան ընտրություններին միջամտությունը թանկ է արժենալու:
Ռուսաստանի Դաշնությունների խորհրդի խոսնակ Վալենտինա Մատվիենկոն, Պետդումայի արտաքին հարաբերությունների հանձնաժողովի ղեկավար Ֆրանց Կլինցեւիչը նախազգուշացրել են, որ ԱՄՆ-ն փորձում է ապակայունացնել վիճակը Ռուսաստանում՝ ինչպես երկրի ներսում, այնպես էլ նախկին ԽՍՀՄ երկրների միջոցով: Ավելի վաղ արտաքին գործերի նախարար Սերգեյ Լավրովը հայտարարել էր, որ Ռուսաստանում ամերիկյան գլխավոր հյուպատոսության փակումը նույնպես Ռուսաստանն ապակայունացնելու փորձ է:
2018 թվականին Ռուսաստանում նախագահական ընտրություններ են կայանալու, եւ չնայած Վլադիմիր Պուտինը դեռ չի հայտարարել առաջադրվելու մասին, դրանում ոչ ոք չի կասկածում: Հարցն այն է, թե ԱՄՆ-ն ինչպես կարձագանքի Ռուսաստանի հակաամերիկյան քայլերին:
Բանը միայն ընտրություններին միջամտությունը չէ: Կա եւս մեկ պատմություն, որը սպառնում է միջազգային խոշոր սկանդալի վերածնվել: ԱՄՆ-ն Կուբայից դուրս է բերել իր դեսպանության աշխատակիցների մեծ մասին, երբ պարզվել է, որ մի քանի ամիս շարունակ Հավանայում դեսպանատան ավելի քան 10 աշխատակիցներ ձայնային զենքի կիրառման պատճառով լուրջ վնասվածքներ են ստացել:
Կուբան պաշտոնապես հավաստիացրել է, որ կապ չունի այդ զենքի կիրառման հետ: Կասկածներն ընկնում են Ռուսաստանի վրա, եւ այժմ ԱՄՆ-ն հավանաբար փորձում է համոզել Կուբային ցույց տալ իրական մեղավորին:
Եթե իրոք պարզվի, որ Ռուսաստանը մասնակից է այդ աղմկոտ գործին, ավելի կոշտ պատժամիջոցներ կհետեւեն:
Ռուսաստանում վիճակն առանց այդ էլ անկայուն է: Վերջին մի քանի օրերին սնանկացել են երկու խոշոր բանկեր՝ Օտկրիտիեն եւ Բինբանկը, ինչպես նաեւ Վիմ ավիա խոշոր ավիափոխադրողը: Տնտեսագետները չեն բացառում քաոսը տնտեսությունում կամ էլ սեփականության նոր վերաբաշխումը: Իսկ դա անկայունության ամենամեծ աղբյուրն է:
Հայաստանը լիակատար աջակցություն է հայտնում Ռուսաստանի իշխանություններին եւ խոսում կապերի ամրապնդման մասին: Փորձագետները, սակայն, նշում են, որ Ռուսաստանի դեմ ԱՄՆ նոր պատժամիջոցներն ուղղված են ոչ միայն Ռուսաստանի քաղաքացիների, այլ նաեւ ցանկացած երկրում անձանց դեմ, որոնց ԱՄՆ-ն կմեղադրի Ռուսաստանի հետ համատեղ անօրինական գործարքների մեջ: