Սուրենյանը պարզաբանում է

«ՀԺ» / Հոկտեմբերի 2-ին եւ 3-ին ժամանակ առ ժամանակ, իսկ 4-ին` հատկապես գիշերը եւ երեկոյան ժամերին հանրապետության շրջանների զգալի մասում սպասվում է անձրեւ եւ ամպրոպ, ամպրոպի ժամանակ՝ քամու ուժգնացում՝ 17-22 մ/վ արագությամբ:

Արդեն հաջորդ օրերին՝ հոկտեմբերի 5-ին եւ 6-ին սպասվում է առավելապես առանց տեղումների եղանակ: Քամին կլինի հարավ-արեւմտյան՝ 3-8 մ/վ արագությամբ: Օդի ջերմաստիճանը հոկտեմբերի 2-3-ը կնվազի 5-6 աստիճանով, հոկտեմբերի 5-6-ին՝ ցերեկը կբարձրանա 3-4 աստիճանով:

Հոկտեմբերի 2-3-ին հանրապետությունում առավելագույն ջերմաստիճանը կհասնի +20-ի:

Այդ օրը ցերեկը +18 +20 աստիճան կդիտվի Արարատում, Արմավիրում, Վայոց Ձորի նախալեռներում, ինչպես նաեւ Երեւանում:

Վաղը՝ հոկտեմբերի 3-ին, առավելագույն ջերմաստիճանը կլինի +17 +19: Այն կդիտվի դարձյալ վերոնշյալ շրջաններում:

Հոկտեմբերի 2-3-ին, նվազագույն ջերմաստիճանը կհասնի ընդհուպ մինչեւ +6 աստիճանի: Այդպիսի ջերմաստիճան կդիտվի Շիրակում, Կոտայքի լեռներում, Գեղարքունիքում, Վայոց Ձորի լեռներում:

Ինչ վերաբերում է Երեւանին՝ հոկտեմբերի 2-ին ժամանակ առ ժամանակ, 4-ին` հատկապես գիշերը եւ երեկոյան ժամերին սպասվում է անձրեւ եւ ամպրոպ, ամպրոպի ժամանակ քամու ուժգնացում՝ 15-20 մ/վ արագությամբ: Հոկտեմբերի 5-6-ին սպասվում է առավելապես առանց տեղումների եղանակ:

Այս տեղեկությունները հրապարակվել է Արտակարգ իրավիճակների նախարարությունը՝ իր պաշտոնական կայքէջում:

Իսկ ԱԻՆ հիդրոմետ ծառայության օդերեւութաբանության կենտրոնի պետ Գագիկ Սուրենյանը ֆեյսբուքյան իր էջում անդրադարձել է սպասվող աննախադեպ խստաշունչ ձմեռվա մասին լուրերին:

«Այն որ ասում են՝ մի ապուշ քարը գցում է փոսը, 100 խելոք չեն կարողանում հանել, այս անգամ այդ ապուշը դարի ցուրտ ձմեռ ժողովրդին խոստացողն է: Ով տեսնում է, դա է հարցնում:
Ժողովուրդ ջան, մեկ անգամ հերքել ենք, կրկին ենք հերքում: Հայաստանի եւ ընդհանրապես աշխարհի ոչ մի Հիդրոմետ ծառայություն նման բան չի տարածել: Այդ լուրը համացանցում տարածել են ֆեյքերը»,- գրել է նա:

Մեր զրույցում Գագիկ Սուրենյանն ասաց, որ ձմեռվա մասին կանխատեսումներ անելու անելու համար դեռ վաղ է: Այդ մասին հնարավոր կլինի խոսել աշնան վերջին: