Կուսաթաղանթի վերաբերյալ տարրական հարցեր. պատասխանում է սեքսոպաթոլոգը

Kiss.am-ի «Ընթերցողների հարց բժշկին» խորագրով ուղղված հարցերին պատասխանում է սեքսապաթոլոգ Վրեժ Շահրամանյանը:

Գայանե/Հարց- Բարև Ձեզ, ինձ մոտ կա սեռական ցանկության պակաս: Ընդհանրապես ցանկություն չեմ ունենում, խնդրում եմ ասեք՝ դա ինչի՞ց է:

Վրեժ Շահրամանյան-Սեռական ցանկության նվազման կամ բացակայության պատճառները բազմազան են` տարիք, դեպրեսիա, սթրես, նևրոզ, անկանոն սննդակարգ, հորմոնային որոշ խանգարումներ: Սեռական ցանկության նվազումը բնորոշվում է սեքսուալ երևակայության աղքատացմամբ, սեռական ցանկության նվազմամբ կամ լրիվ բացակայությամբ, ինչը լրջորեն անհանգստացնում է անձին և հաճախ պայմանավորված չէ ոևէ հիմնական հիվանդությամբ: Սեռական ցանկության տևական բացակայությունը կարող է պատճառ հանդիսանալ խոր միջանձնային խնդիրների, անձի նևրոտիզացիայի, ինչպես նաև տարբեր սոմատիկ հիվանդությունների զարգացման համար:

Վարդան/Հարց- Բարև Ձեզ: Մի քանի օր առաջ գնացի սեռավարակի համար անալիզ տվեցի,պարզվեց որ ինձ մոտ առկա է Գարդներելլա և սնկային: Երկու բժշկի մոտ գնացի. մեկը դեղեր նշանակեց, մյուսը ասաց, որ լուրջ բան չի, հենց իմունիտետդ բարձրանա կվերանան այդ հիվանդությունները: Կխնդրեի ինֆորմացիա տայիք այդ հիվանդության վերաբերյալ և արդյոք հնարավոր է առանց որևէ բուժման վերանան այդ հիվանդությունները:

Վրեժ Շահրամանյան- Գարդներելան բավական լայն տարածում գտած հիվանդություն է: Գարդներելան համարվում է կանացի հեշտոցամուտքի մանրէ, որը բավական տարածված է: Այն կարող է հայտնաբերվել մրսածության, հորմոնային խանգարման, երկարատև հակաբիոտիկոթերապիայի հետևանքով: Այս հիվանդության պատճառներից մեկն այն է, որ կնոջ հեշտոցում կան լակտոբակտերիաներ, որոնք առաջացնում են թթվային միջավայր: Այն ճնշող ազդեցություն ունի այդ մանրէների վրա: Երբ լակտոբակտերիաների ճնշող ազդեցությունը սկսում է նվազել, գարդներելայի համար բարենպաստ միջավայր է ստեղծվում: Գարդներելոզի ժամանակ լինում է սպեցիֆիկ ձկան հոտ, թույլ քանակի սպիտակ, մոխրագույն արտադրությամբ: Չի բացառվում, որ գարդներելան առաջանա, ինչպես արդեն նշեցինք, անտիբիոտիկների օգտագործումից հետո` մրսածության հետեւանքով կամ, ինչպես նաեւ ներհեշտոցային լվացումներից: Իր բուժման մեխանիզմով գարդներելան ամենահեշտ բուժվող հիվանդություններից մեկն է համարվում: Բուժումից հետո պետք է պարտադիր բարձրացվի հեշտոցի թթվայնությունը, կարգավորվի դիմադրողականությունը, իսկ դրա համար նշանակվում են անհրաժեշտ դեղամիջոցներ:

Արարատ/Հարց- Ես 22 տարեկան եմ: Ինձ մոտ սեռական ակտից հետո աջ ամորձու շրջանում նկատվում է անհանգիստ վիճակ, մեկ-մեկ նաև ցավեր: Նման բան նկատվում է նաև սեռական օրգանի գրգռվելուց հետո: Օրգազմի ժամանակ նույն աջ ամորձին կծկվում, փոքրանում է: Մեկ-երկու ամիս է ինչ կա այս խնդիրը: Ինչի հետ է դա կապված, վտանգավոր է արդյոք:

Վրեժ Շահրամանյան- Ցավը յուրովի ազդանշան է սեռական համակարգի անառողջ վիճակի վերաբերյալ: Նման պատկեր կարող է առաջանալ սեռական օրգանների, մասնավորապես, ամորձիների շագանակագեղձի, սերմնաբշտերի, սերմնածորանների բորբոքման ժամանակ: Պետք չէ հապաղել, ցանկալի է ստուգվել՝ ցավի բնույթը պարզելու և համապատասխան բուժում նշանակելու համար: Ստույգ ախտորոշման համար պետք է նաև սերմնահեղուկի մանրակրկիտ հետազոտություն կատարել, որից հետո նշանակել համապատասխան բուժում: Առո՛ղջ եղեք:

Գոհար/Հարց- Ես շատ հազվադեպ և շատ կարճ տևողությամբ եմ զգում սեռական բավարարվածություն: Ի՞նչ անել:

Վրեժ Շահրամանյան-Օրգազմը սեռական գրգռման գագաթնակետն է, որն ուղեկցվում է բավարարվածության և հաճույքի ուճեղ զգացումով: Այն տեղի է ունենում սեռական հարաբերության ավարտին` էրոգեն գոտիների /հիմնականում՝ սեռական օրգանների/ մեխանիկական խթանման դեպքում: Սեռական բավարարվածության խնդիրները կարող են պայմանավորված լինել ամենատարբեր գործոններով՝ հոգեբանական, ֆիզիկական կամ միջանձնային: Իհարկե, այն կարելի է վերականգնել , պարզապես անհրաժեշտ է առաջին հերթին պարզել վերջինիս պատճառները: Պարզապես պետք չէ շատ ուշացնել, որովհետև հնարավոր է հետագայում այդ վիճակը ազդի Ձեր նյարդային համակարգի վրա, ինչպես նաև սեռական ցանկության վրա և, ի վերջո, Ձեր միջանձնային հարաբերությունների վրա: Հնարվավոր է նաև ժամանակի խնդիր լինի, եթե Դուք նոր եք սկսել սեռական կյանքով ապրել և շատ երիտասարդ եք, կարող է ժամանակի ընթացքում խնդիրը կարգավորվի, նույնիսկ ծննդաբերությունից հետո:

Լյուսի/Հարց-Եթե կուսաթաղանթն արտաքինից փակ է, նշանակում է՝ տվյալ աղջիկը կույս է:

Վրեժ Շահրամանյան- Կուսաթաղանթը արտաքինից փակ կամ բաց չի լինում: Դա բարակ թաղանթ է, որը մասնակի փակում է հեշտոցը և տեղակայված է հեշտոցամուտքից 2-3 սմ խորության վրա: Այն կարող է լինել կլորավուն, մեկ կամ մի քանի անցքով, հաճախ բավականին մեծ, նույնիսկ մատի շրջագծով: Երբեմն կուսաթաղանթը լինում է կիսալուսնաձև: Կուսաթաղանթի ամբողջականությունը չի խախտվում միանգամից: Դրա համար պահանջվում է մի քանի սեռական հարաբերություն: Ուստի հնարավոր է, որ հերթական սեռական հարաբերությունը ուղեկցվի արյան հետքերով: Սակայն դա միանշանակ չէ, քանի որ լինում են կուսաթաղանթի տարբեր տեսակներ և տեղակայումներ, որից և կախված է այն փաստը, թե ինչպես կխախտվի կուսաթաղանթի ամբողջությունը: Այստեղ նաև դեր է խաղում սեռական հարաբերության բնույթը, առնանդամի ներհրման բնույթը, առնանդամի չափը: Երբեմն հենց առաջին սեռական հարաբերությունից կուսաթաղանթը ամբողջովին խախտվում է և հաջորդող հարաբերության ընթացքում այլևս որևէ արյան հետք չի նշմարվում:

Նելլի Գ./Հարց- Հարգելի բժիշկ: Գանգատվում եմ կանացի սեռական օրգանի արտաքին շրթունքի վրա անտանելի քորով, որը սկսվում է ամեն երեկո: Առավոտյան քորի զգացում չեմ ունենում, կամ՝ հազվադեպ, իսկ երեկոյան ուժեղ քորի զգացում: Ունեցել եմ սնկային հիվանդություն՝ բուժվել եմ: Այտուցված վիճակ՝ չկա նախքան քորը, քորից հետո այն կարմրում է և այտուցվում ցանի տեսքով: Հարց: Ինչի՞ արդյունք կարող է լինել, գուցե կա՞ ալերգիա, արդյո՞ք դա լուրջ խնդիր է: Կանխավ շնորհակալություն:

Վրեժ Շահրամանյան-Ալերգիայի տարբերակը չի բացառվում: Սակայն Ձեր նկարագրած պատկերը կարող է պայմանավորված լինել լիարժեք չբուժված կամ կրկնվող սնկային ախտահարմամբ կամ բորբոքումով: Նման դեպքերում է ցանկալի է կատարել սեռավարակների ստուգում, ընդ որում՝ ԵՐԿՈՒՍՈՎ: Հատուկ ուշադրություն է պետք դարձնել սեռական օրգանների հիգիենային /օրը 2 անգամ լվանալ գոլ ջրով` օգտագործելով ինտիմ հիգիենայի համար նախատեսված հատուկ գելեր/, օգտակար են նաև Երիցուկի թուրմով լվացումները: Սրանք այն միջոցներն են, որոնք կարելի է կիրառել` առանց տեսնելու և հետազոտելու: Առողջ եղեք: