Սուր շնչառական հիվանդությունների կտրուկ աճ՝ դպրոցներում

Սուր շնչառական հիվանդությունների բավական մեծ քանակով դեպքեր են գրանցվել:

Այս մասին այսօր լրագրողների հետ հանդիպման ժամանակ հայտարարել է Նորքի Ինֆեկցիոն կլինիկական հիվանդանոցի տնօրեն, ՀՀ առողջապահության նախարարության գլխավոր ինֆեկցիոնիստ Արա Ասոյանը:

Հատկապես վերջին շրջանում սուր շնչառական հիվանդությունների կտրուկ աճ է գրանցվել դպրոցներում, մանկապարտեզներում, սակայն գլխավոր ինֆեկցիոնիստի խոսքով՝ իրավիճակը վերահսկելի է:

«Այս վարակը գրիպ չէ։ Գրիպը նույնպես սուր շնչառական հիվանդություն է, բայց սա ավելի ծանր տեսակ է, որին բնորոշ են շատ բարդություններ: Այն, ինչ մենք այսօր ունենք, դա ուղղակի սուր շնչառական վիրուս է»,- նշել է Արա Ասոյանը:

Վերջինիս խոսքով՝ սուր շնչառական հիվանդությունների աճի պատճառները բազմաթիվ են, բայց հիմանականը, ըստ նրա, վերջին օրերին ջերմաստիճանի կտրուկ իջեցումն է:

«Այս տարին բացառություն չէ։ Ինչպես ամեն տարի այս ժամանակահատվածում լինում է հիվանդությունների աճ, որն արտահայտվում է ջերմությամբ, հազով, քթից լորձ է հոսում, մի մասի մոտ կարող է արտահայտվել նաև անգինայով, բայց բարդությունները բավական քիչ են»,- լրագրողների հետ զրույցում տեղեկացրել է Ասոյանը:

Գլխավոր ինֆեկցիոնիստը բոլոր քաղաքացիներին հորդորում է երեխայի մոտ հիվանդություն հայտնաբերելու դեպքում դիմել տեղամասային կլինիկա: Այնուամենայնիվ, Ասոյանը հստակ վիճակագրություն չի ներկայացրել, քանի որ թվերն իրական պատկերը չեն արտահայտում։ Նա միայն տեղեկացրել, որ Նորքի Ինֆեկցիոն կլինիկական հիվանդանոց օրական միջինում 8-10 երեխա է դիմում:

Ասոյանի խոսքով՝ այժմ տարածված սուր շնչառական վիրուսը օդակաթիլային ճանապարհով փոխանցվող է եւ դժվար է խուսափել դրանից. «Խուսափելու համար պետք է հիվանդ երեխային դպրոց կամ մանկապարտեզ չուղարկեն, որովհետեւ հենց դպրոցներն ու մանկապարտեզներն են այդ հիվանդությունը տարածողը: Կարծում եմ՝ աշնանային արձակուրդը կազդի չտարածման վրա»,- նշել է գլխավոր ինֆեկցիոնիստը: