Մեռնող քաղաքի իշխանության շռայլությունները

«Փաստ» օրաթերթը գրում է.
Վանաձորի համայնքապետարանը 2017 թ. գնումների պլանի լրացում է կատարել, որը հրապարակվել է ՀՀ ֆինանսների նախարարության գնումների պլանում:
Ըստ լրացված պլանի՝ համայնքապետարանն այս տարի միայն ավտոմեքենաների սպասարկման, վերանորոգման և պահեստամասեր ձեռք բերելու համար ահռելի ծախսեր է նախատեսել:
ԲԸԱՀ (Բանակցային ընթացակարգ՝ առանց գնումների հայտարարությունը նախապես հրապարակելու) գնման ձևով համայնքապետարանը ավտոմեքենաների ընթացիկ նորոգման համար նախատեսել է ծախսել 928000 ՀՀ դրամ:
Նույն ընթացակարգով ավտոմեքենաների սպասարկման համար պետական կառույցը կծախսի 996000 ՀՀ դրամ: Գնման պլանում ներկայացվել են նաև տարբեր մակնիշի մեքենաների համար անհրաժեշտ առանձին ծախսերը:
Այսպես՝ «Տոյոտա Քամրի» ավտոմեքենայի պահեստամասեր ձեռք բերելու համար կծախսվի 990000 ՀՀ դրամ: «Մերսեդես Բենց» ավտոմեքենայի պահեստամասերի համար էլ՝ 986000 ՀՀ դրամ: Իսկ «Վազ 2121–14» ավտոմեքենայի պահեստամասեր գնելու համար կծախսվի 964000 ՀՀ դրամ: «Գազ 3110–101» ավտոմեքենայի պահեստամասերի համար՝ 860000 ՀՀ դրամ: Ավտոմեքենաների սպասարկման, վերանորոգման և պահեստամասեր ձեռք բերելու համար համայնքապետարանն ընդհանուր առմամբ կծախսի 6484000 ՀՀ դրամ:

ԽՄԲ․ - Հիշեցնենք, որ ՀՍՍՀ հանրապետական ենթակայության Կիրովական քաղաքը անվանափոխվեց «Վանաձոր»՝ 1992 թ․։ Սովետական միության վերջին շրջանում՝ 1988 թ․ տվյալներով, քաղաքն ուներ մոտ 200 հզ․ բնակիչ, ահռելի գիտա-արտադրական, մշակութային ու տուրիստական ռեսուրսներ, գեղեցիկ ու քաղաքակիրթ դեմք։

Քաղաքն այսօր ՀՀ Լոռու մարզկենտրոնն է, ունի փաստացի 70 հզ․ բնակիչ և գրեթե ամբողջովին ոչնչացված էկոնոմիկա, գիտություն ու ենթակառուցվածքներ։