Հարկային ստուգումներ՝ Սամվել Ալեքսանյանին պատկանող ընկերություններում

ՀՀ պետական եկամուտների կոմիտեի նախագահ Վարդան Հարությունյանն օրեր առաջ հրավիրած մամուլի ասուլիսում պատասխանելով armtimes.com-ի հարցին ասել էր, որ հարկային ստուգումներ իրականցվում են ռիսկային ընկերություններում: Այդ ընկերություններին ընտրում է համակարգիչը եւ ստուգման նախնական պլան է լինում: Այսինքն՝ 2016 թվականին որոշվում է, թե որ ընկերությունում պետք է ստուգումներ իրականացվեն 2017 թվականին եւ այս տրամաբանությամբ՝ նախորդող եւ հաջորդող տարիներին:

Armtimes.com-ը ՊԵԿ փաստաթղթերի ուսումնասիրությունից պարզեց, որ 2017 թվականի հուլիսի 1-ից մինչեւ 2018 թվականի հուլիսի 1-ն ընկած ժամանակահատվածում պլանավորված ընկերությունների ցանկում, բացի «Մուլտի գրուպ» կոնցեռնից, «Քեթրին գրուպ» ընկերությունից, կան նաեւ այլ հայտնի ընկերություններ, որոնք փոխկապակցված են պետական պաշտոններ զբաղեցրած եւ զբաղեցնող անձանց հետ:

Ընթացիկ եւ հաջորդ տարվա համար կազմված ցանկում կա 1385 ընկերություն, որոնցից բարձր ռիսկային խմբում ընդգրկվածները 1098-ն են, միջին ռիսկայնության խմբում ընդգրկվածները 219-ն են, իսկ ցածրում ընդգրկված է 68 տնտեսվարող սուբյեկտ: ՊԵԿ-ի փաստաթղթում դասակարգված չեն ցածր, բարձր եւ միջին ռիսկայնություն ունեցող ընկերությունները, ուստի դրանք առանձնացնելն ու պարզելը որոշակի ժամանակ կպահանջվի:

2017-2018 թվականների ստուգումների պլանում նախատեսված է ստուգում իրականացնել «Ալեքս հոլդինգ», «Ալեքս տեքստիլ», «Նատալի ֆարմ» ընկերություններում: Երեք ընկերությունն էլ կապված են ԱԺ հանրապետական խմբակցության պատգամավոր Սամվել Ալեքսանյանի, նրա ընտանիքի անդամների հետ: «Ալեքս հոլդինգ»-ի մեջ են մտնում Ալեքսանյանի պատկանող սուպերմարկետները, տարադրամի փոխանակման կետերը եւ այլն:

«Ալեքս տեքստիլ»-ը տրիկոտաժի արտադրությամբ զբաղվող թեթեւ արդյունաբերական օբյեկտ է, որտեղ օրերս այց էր կատարել նաեւ Սերժ Սարգսյանը: «Նատալի ֆարմ»-ն էլ այն ընկերությունն է, որը հանդիսանում է «Աստղիկ բժշկական կենտրոն»-ի հիմնադիր սուբյեկտը, Ալեքսանյաներին պատկանող «Նատալի ֆարմ» դեղատների ցանցի գործունեությունն ապահովողը եւ այլն:

Սամվել Ալեքսանյանի ընկերություններից «Ալեքս գրիգ» ընկերությունում հարկային ստուգումներ են տեղի ունեցել 2016 թվականի մարտ ամսին: Նշենք, որ Սամվել Ալեքսանյանն այժմ իր հետ փոխկապակցված ընկերություններն աշխատացնում է «Ալեքս հոլդինգ»-ի անվան տակ, իսկ «Ալեքս գրիգ»-ն անցյալում է: «Ալեքս հոլդինգ»-ում, օրինակ, առաջին անգամ պետք է հարկային ստուգում անցկացվի: «Նատալի ֆարմ»-ում հարկային ստուգում իրականացվել է 2016 թվականի հունիս ամսին: «Ալեքս տեքստիլ» ընկերությունը, ինչպես «Ալեքս հոլդինգ»-ը, առաջին անգամ է առնչվելու հարկային ստուգողների հետ: