«Հյուսիս-Հարավի» կնքահայրը Տիգրան Սարգսյանն է

Օրեր / Վերջին շրջանում ԶԼՄ-ների ուշադրության կենտրոնում կրկին «Հյուսիս-Հարավ» ճանապարհային ծրագիրն էր: Թեմայի շուրջ եղան տարբեր հրապարակումներ՝ հատկապես խոսվեցին բացթողումների, անորակ աշխատանքների, ինչպես նաեւ փողերի լվացման մասին: Նկատենք, որ նյութերում հիմնական շեշտը դրվում էր նախկին վարչապետ Հովիկ Աբրահամյանի վրա, ասվում էր, թե նրա օրոք է հիմք դրվել ծրագիր, դեռ այդքանն էլ քիչ է՝ ճանապարհաշինության աշխատանքները նրա հրահանգով են սկսվել իրականացվել Արտաշատից՝ իր ու հարազատների «կոմֆորտ» տեղաշարժն ապահովելու համար:
Տեղեկությունը ճշտելու համար Orer.am-ը հարցում էր ուղարկել ՀՀ տրանսպորտի, կապի եւ տեղեկատվական տեխնոլոգիաների նախարարին:Թեեւ հարցումն ինքնին հեշտ էր ու մաթեմատիկական բարդ հաշվարկներ չէր պահանջում, բայց այնուամենայնիվ համապատասխան գերատեսչությունն ընտրել էր հարցմանը պատասխանելու ամենաերկար ժամկետը, ինչեւէ։
Ըստ պաշտոնական տեղեկատվության, Հյուսիս-Հարավ ճանապարհային միջանցքի ներդրումային ծրագիրը մեկնարկել է դեռ 2009թ-ի սեպտեմբերի 15-ին՝ Հայաստանի Հանրապետության ու Ասիական զարգացման բանկի միջեւ ստորագրված շրջանային ֆինանսավորման համաձայնագրի ստորագրմամբ: «Տրանշ 1» ծրագրի վարկային համաձայնագիրը ստորագրվել է 2009թ-ի հոկտեմբերի 12-ին, իսկ շինարարական աշխատանքները սկսվել են 2012 թ-ի հունիսին:

Պարզ դարձավ նաեւ, որ կառուցապատման ենթական ճանապարհները ընտրվում են ֆինանսավորվող միջազգային դոնորների հետ համատեղ՝ հիմք ընդունելով տեխնիկատնտեսական ուսումնասիրության արդյունքները եւ հասանելի վարկային միջոցները:
Մինչ օրս շինարարական աշխատանքներ են իրականացվել հետեւյալ ծրագրով ՝
Տրանշ 1 - Երեւան-Արտաշատ եւ Երեւան-Աշտարակ ճանապարհահատվածներ
Տրանշ 2 - Աշտարակ-Թալին ճանապարհահատվածներ
Տրանշ 3 - Թալին-Գյումրի ճանապարհահատվածներ
Այստեղից պարզ է դառնում, որ նախկին վարչապետը, ում թիրախավորելը ոմանց մոտ բնավորության վատ գիծ է դարձել, որեւէ առնչություն չունի ո՛չ միջպետական ճանապարհի շինարարական աշխատանքների մեկնարկի ու ո՛չ էլ կոնկրետ ճանապարհահատվածներում իրականացվող կամ իրականացված ճանապարհաշինարարական աշխատանքների հետ: Այս պարագայում շատ ավելի արդար կլինի նշել իրական հեղինակի անունն ու այն հանգամանքը, որ իր պաշտոնավարման ժամանակ մեկ անգամ չէ, որ Աբրահամյանը քննադատել է տարվող աշխատանքները ու խիստ վերահսկողության հրահանգ տվել: