Զորակոչային հանձնաժողովները կվերանան

Այսօր / Տեղական զորակոչային հանձնաժողովները վերանալու են, որոնք իրական կյանքում չեն գործում, այսօր «Զինապարտության և զինվորական ծառայության մասին օրենսդրական նոր կարգավորումների վերաբերյալ» թեմայով խորհրդարանական լսումների ժամանակ հայտարարեց պաշտպանության նախարար Վիգեն Սարգսյանը։

Զինկոմիսարիատներում գործող հանձնաժողովը, ըստ նախարարի, անելիք չունի, քանի որ այդ հանձնաժողովներում պատասխանատվությունը «լղոզվում» է։

Ինչ վերաբերում է բուժզննմանը, Սարգսյանն ասաց, որ այդ դաշտում իրավիճակը մտահոգիչ է։

«Մենք ունենք մտահոգիչ վիճակ, որտեղ նորակոչիկի առողջական վիճակի որոշման խնդիրը 3-4 օղակի վրա է թողնված՝ լղոզված պատասխանատվություն: Մեկը տալիս է եզրակացություն վիզուալ կոնտակտի հիման վրա, ուղեգրում է մարդկանց շրջանային պոլիկլինիկաներ զննում անցնելու և հանձնաժողով՝ արդյունքները ներկայացնելու: Բուժհաստատությունը որոշման համար պատասխանատվություն չի կրում, բժիշկն ասում է՝ էխոյի վրա տեսել եմ քար, հանձնաժողովն ասում է, բերել է քարի ախտորոշում, ես էլ գրել եմ ոչ պիտանի ու շատ դժվար էր հասկանալ, թե որ օղակում է որոշումը կեղծված», - իրավիճակը ներկայացրեց Պաշտպանության նախարարը:

Պաշտպանության համակարգում կատարվող օրենսդրական փոփոխություններով ելքը գտել են։

«Այսօր, երբ մեր բոլոր քաղաքացիները ունեն ընտանեկան բժիշկների կցագրում և պետությունը նախազորակոչային տարիքում նախատեսում է երկու անգամ ամբողջական բուժզննում, բացարձակ անիմաստ է հսկայական գումարներ ծախսել պետական բյուջեից՝ զինկոմիսարիատում բուժհանձնաժողով պահելու համար: Քաղաքացին պետք է ունենա ստանդարտ առողջական վիճակի գնահատման ձև, որի տակ իր կցագրման բուժհաստատությունը՝ պոլիկլինիկան, ամբուլատորիան պիտի պատասխանատվություն ունենա և ստորագրի՝ ես զննել եմ, այս հիվանդությունն ունի կամ չունի: Հանրապետական հանձնաժողովը պիտի շարունակի գործել, բայց փորձագիտական լրջագույն կարողություններ ենք ձգտում ձևավորել, որ այդ հանձնաժողովը ևս պատասխանատվություն կրի իր տված որոշման համար: Ոչ թե հակասություն լինի «Էրեբունիի» տված բժշկական թո՞ւղթն է արժանահավատ, թե՞ «Արմենիա» բուժկենտրոնի: Այսինքն՝ մենք՝ որպես զորակոչ կազմակերպող օղակ, պետք է կարողանանք օբյեկտիվ ախտորոշում կազմակերպելու և կրելու պատասխանատվություն որոշման համար՝ պիտանի՞ էր ծառայության, թե՞ ոչ», - ասաց Վիգեն Սարգսյանը: