Արշակն այսօր կդառնար 26 տարեկան, նրա ինքնասպանության վարկածը կասկածի տակ է

Այսօր Գյումրու քաղաքապետի թեկնածու Վարդևան Գրիգորյանի կրտսեր որդու` Արշակի հոգեհանգիստն է, իսկ վաղը` սեպտեմբերի 23-ին, երիտասարդին կհուղարկավորեն: Հարազատներից տեղեկացանք, որ այսօր Արշակի ծննդյան օրն է, նա կդառնար 26 տարեկան:

Հիշեցնենք, որ Արշակ Գրիգորյանին սեպտեմբերի 20-ին Գևորգյանների առանձնատան նկուղում հարազատները հայտնաբերել էին գլխուղեղի հատվածում հրազենային վնասվածքով, որը կյանքի հետ անհամատեղելի էր: Իրավապահ մարմինները շարունակում են դեպքը որակել ինքնասպանություն, մինչդեռ սպանության վարկածը շատերի կարծիքով ամենահավանականն է: Մեր տեղեկություններով` Արշակն ինքն էր զբաղվում հոր քաղաքական PR-ով: Վարդևան Գրիգորյանի պաշտոնական ֆեյսբուքյան էջով նա իրականացնում էր քարոզչություն, ԲՀԿ Գյումրու տարածքային գրասենյակում ակտիվ գործունեություն էր ծավալում:

Hraparak.am-ը գրում է․

Որքան էլ որոշ քաղաքական ուժեր հորդորում են երիտասարդի մահը չքաղաքականացնել, այնուամենայնիվ Գյումրու նախկին քաղաքապետ Վարդան Ղուկասյանից հետաքրքրվեցինք` ինչ կարծիքի է կատարվածի հետ կապված: «Ինչ կարծիքի եմ, նորմալ է, որ նորմալ առողջ տղամարդը, որ հոգեկան խնդիր չունի, ինքն իրան վերացնի:Ես իմ խորին հարգանքն ու ցավակցություններն եմ Գևորգյանների ընտանիքին հայտնում: Մնացած` կարծիքս հայտնեցի»,-հակիրճ պատասխանեց նախկին քաղաքապետը:

ԲՀԿ առաջնորդ Նաիրա Զոհրաբյանը, որ այս օրերին Հայաստանում չէր, լուրը լսելուն պես շտապել է Գյումրի` գտնվելու Վարդևան Գրիգորյանի կողքին: Նրա համար ևս անհասկանալի եւ անհավատալի է երիտասարդի առեղծվածային մահը: ԲՀԿ առաջնորդը մեզ հետ զրույցում նշեց, որ ինքնասպանության վարկածն իր համար անընդունելի է, մնացածը ժամանակը ցույց կտա: «Մենք շարունակելու ենք ընտրապայքարը: Քարոզարշավի ողջ պատասխանատվությունը խմբակցությունը կվերցնի իր վրա» -ընդգծեց նա:

Նաիրա Զոհրաբյանի խոսքերից ենթադրելի է, որ չնայած մեծ ողբերգությանը, Վարդևան Գրիգորյանը կշարունակի քաղաքական պայքարը: Դեպքի պատճառով Գյումրիում թեկնածու բոլոր կուսակցությունները դադարեցրել են նախընտրական քարոզարշավները, հավաքները: Սպասվում է, որ կուսակցությունները կշարունակեն քարոզչական գործողությունները սեպտեմբերի 24-ից: