Դատի են տվել Արա Թորանյանին

Ֆրանսիական Nouvelles d’Armenie ամսագրի խմբագիր Արա Թորանյանը հոկտեմբերի 17-ին կկանգնի Փարիզի Ընդհանուր իրավասության դատարանի 17-րդ ուղղիչ ատյանի առաջ: Արա Թորանյանին դատի են տվել զրպարտության մեղադրանքով: «Առաջին լրատվական»-ի հետ զրույցում Արա Թորանյանը մանրամասներ ներկայացրեց: Մի քանի տարի առաջ «Լիպերասիոն» կայքում Ռոպեր Ֆորիսոնը Հայոց ցեղասպանությունը ժխտող հոդված է հրապարակել. «Նա միշտ հայերի դեմ հրապարակումներով է հանդես գալիս, ասում, որ ցեղասպանություն տեղի չի ունեցել և փորձում է մեր պարզ պատկերը սևացնել այն բոլոր տեղերում, որտեղ լինում է: Այս հոդվածում էլ նա փորձում էր անել նույնը: Ի դեպ, նա միշտ պաշտպանում է թուրքական կողմը»,- մեզ հետ զրույցում ասաց Արա Թորանյանը: Պատասխան հոդվածում Արա Թորանյանը Ռոպեր Ֆորիսոնին հարց է ուղղել՝ ո՞վ է ձեզ փող տալիս, ո՞վ է ձեր հետևում կանգնած:

Ի դեպ, Արա Թորանյանի շահերը դատարանում պատշպանելու է հայտնի փաստաբան Հենրի Լուկրելցը: Արա Թորանյանը նաև նշեց, որ լավատեսորեն է տրամադրված, մեծ հույս ունի, որ դատը կհաղթի, իսկ եթե պարտվեց, սա կնշանակի, որ Ֆրանսիայում խոսքի ազատություն չկա: Նա նաև նշեց, որ թուրքական լոբբինգը հայերի դեմ լավ է աշխատում:

Ի պաշտպանություն Արա Թորանյանի՝ Ֆրանսիայի ՀԲՄԸ-ն տարածել է հայտարարություն, որտեղ նշվում է, որ ֆրանսիական օրենսդրությունը թույլ չի տալիս դատական հետապնդում ձեռնարկել Հայոց ցեղասպանությունը ժխտողների դեմ։

«Արդա՞ր է, որ վերջիններս կարենան խուսափիլ դատվելե որպես ա՛յն, ինչ որ են, և կարենան դատապարտել տալ զոհերու շառավիղները։ Հարկ է խստիվ դատապարտել դերերը շրջելու և արտահայտության ազատությունը գործիք դարձնելու այս խայտառակ փորձը։ Պաշտպանել արտահայտության ազատությունն ընդդեմ անոնց, որոնք կփորձեն նենգորեն զայն խոտորել, պաշտպանել հալածանքներու զոհերու ժառանգորդները՝ ընդդեմ դահիճներու ժառանգորդներուն, չխոչընդոտել պատմական ճշմարտության փոխանցումը՝ ահավասիկ հոկտեմբեր 17-ին սկսող դատավարության խորհրդանշական գրավականները։ Ամբողջովին կվստահինք մեր երկրի արդարադատության, որ ան պիտի հայտնվի վերոնշյալներուն արժանի բարձրության վրա»։

Ի դեպ, Արա Թորանյանը հաճախ է դատական այսպիսի գործերի կիզակետում հայտվում: Հիշեցնենք, որ նրան մեղադրում էին, որ իր ղեկավարած պարբերականը հրապարակել է Լուարի պատգամավոր Ֆրանսուա Ռոշբլուանի այն հայտարարությունը, որտեղ վերջինս Ադրբեջանը որակում էր որպես «ահաբեկիչ երկիր»:

Ի դեպ, Ֆրանսիայի էլիտան արդեն աջակցություն է հայտնել Արա Թորանյանին՝ Շառլ Ազնավուր, Պերնար-Հանրի Լևի, Սերժ Քլարսֆելտ, Առնո Քլարսֆելտ, Միշել Օնֆրե, Ֆրետերիկ Անսել և այլոք: