Թուրքիայի հավաքականը դարձել է հայերի սարսափը

1in.am / Չեխիայում ընթացող մինչև 17 տարեկան ֆուտբոլիստների Եվրոպայի առաջնությունում Հայաստանի հավաքականը ժամանակից շուտ տապալվեց: Վերջին 3-րդ տուրից առաջ մեր հավաքականն ամրապնդվել է վերջին 4-րդ հորիզոնականում: Հիշեցնենք, որ առաջին խաղում 7:0 հաշվով Չեխիային զիջելուց հետո երեկ մեր հավաքականը 4:0 հաշվով պարտվեց Թուրքիային: Երկու խաղում Հայաստանի հավաքականը, չխփելով ոչ մի գոլ, սեփական դարպասն ընդունել է 11 գնդակ:

Ինչպե՞ս մեկնաբանել տեղի ունեցածը: Այս տարվա մարտին Հայաստանի հավաքականը Անթալիայում մասնակցել էր մինչև 17 տարեկանների Եվրոպայի առաջնության Էլիտ ռաունդին: Այն ժամանակ Հայաստանը Թուրքիային զիջել էր 6:0, Ֆինլանդիային՝ 5:0 և Գերմանիային՝ 10:1 հաշվով: Անթալիայում Հայաստանի ազգային հավաքականը խաղադաշտում անցկացրել էր 4 ժամ: Այդ չորս ժամվա ընթացքում մեր հավաքականն ընդունել էր 21 գնդակ:

Վերջին 5 հանդիպումների կտրվածքով Հայաստանի հավաքականը խփել է մեկ և բաց թողել 32 գնդակ: Այս տարվա հունվարին Մինսկում տեղի ունեցած «Զարգացման գավաթ» մրցաշարում 5 հանդիպումներում նույնքան պարտություն կրելով՝ Հայաստանի հավաքականն ընդունել էր 19 գնդակ: Այդ ժամանակ մեր հավաքականը գլխավորում էր Արթուր Ոսկանյանը: Հիվանդության պատճառով նա չէր կարողացել մեկնել մրցավայր: Որպես ձախողման գլխավոր պատճառ Ոսկանյանը նշել էր խաղային վատ կարգապահությունը: Միևնույն ժամանակ հավաքականի մարզիչը հույս էր հայտնել, որ մինչև Եվրոպայի առաջնության Էլիտ ռաունդը առկա սխալները կշտկվեն: Բոլորս տեսանք, թե ինչպես են շտկվում սխալները և հետևություններ արվում:

Էլիտ ռաունդի շեմին Հայաստանի մինչև 17 տարեկանների հավաքականի գլխավոր մարզիչ էր նշանակվել Արտակ Օսեյանը: Վերջինիս կատարած աշխատանքը, կարծում ենք, մեկնաբանության կարիք չունի: 2016 թվականի նոյեմբերին տեղի ունեցած Եվրոպայի առաջնության որակավորման փուլում Հայաստանի հավաքականը ոչ-ոքի՝ 1:1 էր խաղացել Լեհաստանի հետ, 2:0 հաշվով զիջել Իսրայելին և 3:2 հաշվով առավելության հասել Իսլանդիայի նկատմամբ: Այս մրցաշարին Հայաստանի հավաքականը մասնակցել էր նույն կազմով՝ Արթուր Ոսկանյանի գլխավորությամբ: Եթե չլիներ որակավորման փուլի արդյունքը, ապա կարելի կլիներ փաստել, որ այս հավաքականն իր ֆուտբոլիստներով, կոպիտ ասած, բանի պետք չէ:

Ինչպե՞ս է ստացվում, որ նույն խաղացողները հավասար պայքար են մղում Լեհաստանի հետ, հաղթում են Իսլանդիային, իսկ մի քանի ամիս անց 6:0 հաշվով պարտվում Թուրքիային: Ակնհայտ է, որ կատարվածի գլխավոր մեղավորը պատանի ֆուտբոլիստները չեն: Կարելի էր վատ ելույթ ունենալ, պարտվել բոլոր մրցավեճերում, բայց, ինչպես ընդունված է ասել, պարտվելուն էլ «ձև կա»:

Թուրքական մամուլը երեկվա հաղթանակից հետո ուղղակի ծաղրում է Հայաստանի հավաքականին: Մասնավորապես նշվում է, որ 2017 թվականի հայ-թուրքական ֆուտբոլային դիմակայությունն ավարտվեց 10:0 հաշվով: «Թուրքիայի հավաքականը դարձել է հայերի սարսափը: Երկու 10 հանդիպումներում անպատասխան գնդակ: Այս թվերը ցայտուն կերպով արտահայտում են մեր առավելությունը հարևան երկրի հավաքականի նկատմամբ: Հաջողություն մաղթենք մեր հավաքականին Չեխիայի հետ մրցավեճում»,- ասել էր Թուրքական CBC SPORT հեռուստաընկերության մեկնաբանը՝ անդրադառնալով երեկ տեղի ունեցած հանդիպմանը:

Առաջին խաղում թուրք ֆուտբոլիստները 1:0 հաշվով զիջել են Իսրայելի հավաքականին, և նախընտրական փուլի արգելքը հաղթահարելու համար անհրաժեշտ է 3-րդ տուրում հաղթել Չեխիայի ընտրանուն: Երկրորդ տուրի մյուս խաղում Իսրայելը 2:0 հաշվով հաղթել է չեխերին և գործնականում ապահովել մասնակցությունը հաջորդ փուլում: Հոկտեմբերի 19-ին Հայաստանը մրցելու է հենց Իսրայելի հետ:

Թե ինչ է սպասվում Տիգրան Առաքելյանի գլխավորած հավաքականին առաջիկա խաղում, կարծում ենք, պարզ է: Նույնիսկ պատկերացնելն է սարսափելի, թե ինչ հաշվով կարող է ավարտվել Իսրայել-Հայաստան հանդիպումը: Կարծում ենք՝ շատերը կնախընտրեին, որ այդ հանդիպումն ընդհանրապես տեղի չունենա:

Ինչքա՞ն կարելի է: Եթե ոմանք չունեն ամոթի զգացողություն, դա չի նշանակում, որ կարելի է շարունակ նվաստացնել երկրի պատիվը: