«Ամուսնության նպատակով հարկավոր է 25-30 տարեկան աղջիկ». Լիանա Զուրաբյան

Ասմունքող Լիանա Զուրաբյանը ֆեյսբուքի իր էջի միջոցով որոշել է հարսնացու գտնել մտերիմներից մեկի համար: Նա այդ մասին գրառում է կատարել: Նշել է, որ աղջիկը պետք է լինի 25-30 տարեկան, բարետես եւ խելացի:

«Հարգելի՛ իմ ֆբ-յան ընկերներ, ամուսնության նպատակով հարկավոր է 25-30 տարեկան բարետես, խելացի աղջիկ: Տղան աշխատում եւ բնակվում է ՌԴ-ում: Շուտով պետք է գա Հայաստան: Նրան պետք է շուտափույթ ամուսնացնել, որպեսզի այլեւս մնա հայրենիքում: Լուրջ աղջիկներն առանց քաշվելու թող ինձ անձնական նամակ գրեն...»,- գրել է նա:

Armtimes.com-ի հետ զրույցում Լիանան մեկնաբանեց իր գրառումը: Նա նշեց, որ իսկապես կա այդպիսի երիտասարդ, որն ապրում է Ռուսաստանում, եւ ինքը ցանկանցել է օգնել նրան: Պարզապես, երբ նկատել է, որ մարդիկ դրան լուրջ չեն վերաբերվում եւ հումորի են տալիս, որոշել է հեռացնել գրառումը:

«Մտածեցի՝ ընկերներիս մեջ կարող է լինի, փորձեմ օգտակար լինել, բարի գործ արվի, չէ՞ որ յուրաքանչյուր զույգ, որ կազմվում է, դա սրբություն է, դա արդեն բարի գործ է: Եթե մեկն էլ կամենում է այդ բարի գործը, պետք է այդ կամեցողությունը ողջունել, որովհետեւ դու 2 սրտեր միացնում ես իրար, ընտանիք է ստեղծվում, զավակներ են լինում, դա հրաշալի է: Մտածեցի բարի գործ անեմ, թող զույգ կազմվի. ինչքան աղջիկներ կան, որ մենակ են, ցանկանում են ամուսնանալ: Հետո զգացի, որ մեկնաբանություններում հումորի են տալիս, բարկացա, ասացի՝ փաստորեն պետք չէ ոչ մի բարի գործ անել: Մարդիկ չեն հասկանում, չգիտես՝ ինչպիսի են իրենք: Երեւի իրոք իմ աշխարհը լրիվ տարբեր է մարդկանց աշխարհից»,- ասաց նա:

Ամեն դեպքում նա նշում է, որ երիտասարդին կողակից կգտնեն: Անձնական նամակներով իրեն գրել են, որ կօգնեն հարմար աղջիկ փնտրել: