Սևանի քաղաքապետն էլ գողական չի գնա

Այսօր Սևանի գործող քաղաքապետ Ռուդիկ Ղուկասյանին բերման են ենթարկել: Մարտունու քննչական բաժնում նա հարցաքննվել է ստորգետնյա խողովակների յուրացման հետ կապված քրեական գործի շրջանակներում: Նախօրեին պրն Ղուկասյանին հրավիրել էին քննչական բաժին, սակայն նա, բնականաբար, մերժել էր այդ հրավերը, և այսօր քննիչները նրան ստիպված բերման ենթարկեցին:

Հոկտեմբերի 2-ին Սևանում քաղաքապետի ընտրություններ են, ինչի պատճառով արդեն տևական ժամանակ լարված է քաղաքի մթնոլորտը։ Բանն այն է, որ իշխանությունը չի սատարում ՀՀԿ-ական գործող քաղաքապետին։ Նա կատաղի պայքարի մեջ է մտել Սևան ազգային պարկի տնօրենի տեղակալ, անկուսակցական Սարգիս Մուրադյանի հետ, որն էլ իշխանության պաշտպանյալն է։ Մյուս թեկնածուն անկուսակցական Արա Սմբատյանն է։ Բավականին լարված են նաև մարզպետի և Ռուդիկ Ղուկասյանի հարաբերությունները։ Իշխանական կուլիսներում տեղեկություններ են շրջանառվում, որ քաղաքապետի գլխին սև ամպեր են կուտակվել, դրանցից առաջինն էլ այսօրվա դեպքն էր:

Եթե Ռուդիկ Ղուկասյանը փոքր ինչ հասկացող լիներ, նախագահ Սարգսյանին և նրա խոսքը սեփական հորից շատ հարգեր ու գնահատեր, այն է` չառաջադրվեր ընտրություններին, ապա, անշուշտ, այսօր նա կվայելեր Գյումրու նախկին քաղաքապետ Վարդան Ղուկասյանի և Վանաձորի քաղաքապետ Սամվել Դարբինյանի անդորրը: Բայց նա չհասկացավ և գնաց երկրի առաջին դեմքի կամքին դեմ: Վաղը նրան նորից կհարցաքննեն, հետո մեղասդրանք կառաջադրեն, դե իսկ հետո...