Միայն ուտելիքի վրա՝ 75 մլն․ նոր մանրամասներ Գագիկ Բեգլարյանի որդու հարսանիքից

Hraparak.am-ին Բեգլարյանի որդու հարսանիքի կազմակերպմամբ զբաղված անձանցից մեկը ուշագրավ մանրամասներ է պատմել։

Պարզվում է՝ հարսանեկան արարողության ժամանակ ուտեստներ պատրաստող խոհարարներին ընտրել են մրցութային սկզբունքով։ Մեր զրուցակիցը չգիտեր քանի անձ էր մասնակցել այդ խիստ պատասխանատու մրցույթին, բայց իմացել էր, որ ասենք, Բելաջիոյի խոհարարը մրցույթից դուրս էր մնացել, քանի որ նրա պատրաստած կերակուրները դուր չէին եկել «ժյուրիին»։ Մրցույթի արդյունքում ընտրվել էր 4 խոհարար, որոնցից մեկը Ծաղկաձորի «Մարիոթ» ռեստորանային համալիրի մեքսիկացի խոհարարը, իսկ մյուսը «Ծիրանի» ռեստորանի խոհարարը։ Չորս խոհարարներից յուրաքանչյուրը պատասխանատու է եղել կոնկրետ գործի համար՝ մեքսիկացին ծովային եւ էկզոտիկ ուտեստների, մեկը միայն աղցանների, «Ծիրանիի» խոհարարը բազմազան խորովածների համար եւ այլն։ Երբ նախապես ծրագրվել է ուտեստների քանակը, խոհարարները զգուշացրել են, որ այդ շատ տաք, սառը խորտիկները չեն կարող մի երեկոյի ընթացքում «ուտվել»՝ մարդկային ստամոքսն ունակ չէ այդ քանակի կերակուր ընդունելու։ Բայց նրանց ասվել է՝ դա ձեր գործը չէ։

Մեր զրուցակցի կոպիտ հաշվարկներով միայն ուտելիքի գնման գինը կազմել է մոտ 75 միլիոն դրամ։ Հարսանիքին մասնակցել է 1200 մարդ, առանձին սրահում կերել-խմել են 200-ի չափ թիկնապահներն ու ուղեկցողները։ Թե քանի տաք «բլյուդ» են տվել, մեր աղբյուրը չկարողացավ հաշվել, բայց նա վստահ պնդում էր, որ վերջին 2-3 տաք ուտեստներին մատ կպցնող չի եղել եւ այդ բոլորը հավաքելով աղբամաններն են նետվել։ Ծաղկային հարդարումն իրականացրել է «Էնի ռոզ» ծաղկի սրահը եւ, կարելի է ասել, ծաղիկներ քանակն էլ նույն սկզբունքով է եղել՝ շատ լինի, քիչ չլինի։ Արդեն գրել ենք, որ հարսանիքը վարել է Ավետ Բարսեղյանը, մասնակցել են բազմաթիվ հայ երգիչ-երգչուհիներ՝ Թաթա Սիմոնյանից մինչեւ Արամե, Սոսո Պավլիաշվիլին էլ վրադիր։