Ռուսական պրոպագանդային չի հաջողվում հասնել իրենց նպատակին

Լրագիր / Վրացական լրատվամիջոցների համար ռուսական լրատվամիջոցների տարածած ապատեղեկատվությա դեմն առնելու ուղղությամբ մշտական աշխատանք է տարվում: Վրաց լրագրողներն ու ոլորտի մասնագետները նշում են, որ հատկապես վերջին տարիներին ավելացել են ռուսական ապատեղեկատվության դեպքերը: Վրաստանում փորձում են դրա դեմն առնել հիմնականում ռուսալեզու կայքերի միջոցով:
Մեդիա փորձագետ Նատա Ձվելիշվիլին Թբիլիսիում ընթացող Տեղեկությունների ստուգման աշնանային դպրոցի շրջանակներում անդրադարձել է այս խնդրին՝ նշելով, որ ռուսական ԶԼՄ-ներն առիթը բաց չեն թողնում Վրաստանի մասին վարկաբեկիչ տեղեկություններ տարածելու համար: Պաբերաբար ռուսական ԶԼՄ-ներում տարածվում են Վրաստանի մասին տեսանյութեր կամ լուսանկարներ, որոնք մեկնաբանվում են ռուսական կողմին հարմար տարբերակով:
Օրինակ, երբ նախորդ տարի Թբիլիսիում բողոքի ակցիաներ էին անցկացվում Վրաստանի և ռուսական “Գազպրոմի” միջև գազային բանակցությունների դեմ, ռուսական ԶԼՄ-ներում հայտնվել էին վառելափայտով բեռնված մեքենայի ու փայտ գնող քաղաքացիների լուսանկարները: Ռուսական ԶԼՄ-ները այն մեկնաբանել էին, թե Վրաստանում գազի խնդիր կա, մարդիկ վառելափայտ են գնում, բայց չգիտես ինչու դեմ են ռուսական գազին:
Մեկ այլ դեպքում, երբ Թբիլիսիի կենտրոնում քաղաքացին լոգանք էր ընդունել, ռուսական ԶԼՄ-ները տարածել էին այդ տեսանյութն ու մեկնաբանել, թե իբր Թբիլիսիում մարդիկ օրերով գազ ու ջուր չունեն, այդ քայլերով իրենց բողոքն են հայտնում: Այնինչ, իրականում, ըստ վրաց լրագրողների, սաստիկ շոգի պատճառով քաղաքացին որոշել էր նման մեթոդի դիմել:
“Իրականում շատ հեշտ է պարզել ապատեղեկատվությունը, և ռուսական ԶԼՄ-ներին չի հաջողվում հասնել իրենց նպատակին, այն է՝ վարկաբեկել Վրաստանը”, ասում է Նատա Ձվելիշվիլին:
Վրաց լրագրողների խոսքով՝ այս փուլում ավելացել է ռուսական հակաքարոզչությունը, որն ուղղված է նաև Վրաստանի՝ ԵՄ հետ ասոցացման դեմ:
“Գրում են, որ մեր երեխաները մեծանալու ու համասեռամոլ են դառնալու: Մենք փորձում ենք ռուսալեզու կայքերի միջոցով այս հակաքարոզչության դեմն առնել”,- ասում են վրաց լրագրողները:
Նրանք նկատում են նաև, որ ռուսական կողմը նման տեղեկատվություններ տարածում է հիմնականում անորակ կայքերի, տպագիր մամուլի ու հեռուստաընկերությունների միջոցով: Իսկ առավել հայտնի ռուսական ԶԼՄ-ները հիմնականում զերծ են մնում այս գործելաոճից: