«Ախպեր կարող ա՞ բոզ եմ, իմ մոտ խի՞ չեք խոսում». Ապարանում բարձր մուզիկայի պատճառով գլուխ են ջարդել

Առաջին լրատվական / Արագածոտնի մարզի ընդհանուր իրավասության դատարանում Սամվել Ուզունյանի նախագահությամբ ավարտվել է Շավարշ Մ.-ի գործի դատական քննությունը:

31-ամյա Շավարշին մեղադրանք էր առաջադրվել տուժողի առողջությանը դիտավորությամբ ծանր վնաս պատճառելու համար՝ ՀՀ քրեական օրենսգրքի 112 հոդվածի 1-ին մասով:

Տուժող Մուշեղ Թ.-ն Շավարշի համագյուղացին է:

Ըստ մեղադրանքի՝ 2016 թվականի հոկտեմբերի 24 –ի կեսգիշերին գյուղում անձնական հարցերի շուրջ վիճաբանության ժամանակ Շավարշ Մ.-ն բռունցքով հարվածներ հասցնելով ծեծի է ենթարկել Մուշեղին՝ պատճառելով քթի միջնապատի ծռվածություն, գանգի ոսկրերի կոտրվածքներ, գլխի արյունազեղումներ, գլխուղեղի ծանր սալջարդ: Տուժողի առողջությանը պատճառվել է ծանր վնաս:

Դատարանում Շավարշն իրեն մեղավոր չի ճանաչել: Նա հայտնել է, թե դեպքի օրը ժամը 22-23-ի սահմաններում համագյուղացի Վարդանի մեքենայի մեջ նստած են եղել Վարդանը, ինքը, Սարգիսը, Սմբատը, զրուցել ու երաժշտություն են լսել:

Մոտակա տանից դուրս է եկել համագյուղացի Մուշեղը, մոտեցել, նստել է մեքենա ու պահանջել է, որ երաժշտության ձայնն իջեցնեն: Իր ու Մուշեղի միջև վեճ է առաջացել, ինքը հարվածել է Մուշեղին, իրենք իջել են մեքենայից: Այդ պահին ձայն է տվել Մուշեղի զոքանչը, ասել է, թե Մուշեղը խմած է, խնդրել է նրան տուն տանել: Իրենք մի քանի անգամ Մուշեղին տուն են տարել, բայց նա նորից դուրս է եկել: Իրենք փոխել են իրենց տեղը, ուրիշ տեղ են կանգնել, բայց Մուշեղը նկատել ու նորից է մոտեցել: Հետո Մուշեղի հետևից իրենք են գնացել, որ նրան տուն տանեն: Հասել են նրան, ինքը բռնել է, բայց նա հրել է իրեն, ասել է՝ դու ո՞վ ես, որ ինձ ասես՝ ուր գնամ: Մուշեղը հայհոյել է իրեն, ինքը հարվածել է նրա քթին կամ բերանին: Մուշեղը փախել ու ընկել է առուն: Նրան տարել են Աշտարակի հիվանդանոց, հետո տեղափոխել են Երևան:

Շավարշը պնդել է, որ մեքենայի մեջ մեկ անգամ հարվածել է Մուշեղի դոշին: Փողոցում էլ նրան խփել է մեկ անգամ: Նա հետ-հետ նայելով փախել ու ընկել է առուն: Առաջինը նրան մոտեցել է ինքը, հետո՝ մյուսները: Մուշեղին պառկեցրել են ասֆալտին, գդալով բերանը բացել են, որ լեզուն կուլ չգնա: Մինչև դեպքը ինքն ու Մուշեղը նորմալ հարաբերությունների մեջ էին, ինքը նրան հարվածել է հայհոյանքի պատճառով:

Նախաքննական ցուցմունքում Շավարշը հայտնել է՝ երբ Մուշեղը բացել է Վարդանի մեքենայի դուռն ու նստել է մեքենա, սկսել է անհասցե հայհոյանքներով խոսել: Ինքը նրան ասել է. «Ախպե՛ր, մեզ համար նստած ենք, ի՞նչ ես էկել բարձր խոսում ես, հայհոյում ես, ավելի լավ ա իջի մեքենայից, գնա տուն, խմած ես»:

Մուշեղը պատասխանել է. «Ախպե՛ր, կարող ա՞ ես բոզ եմ, իմ մոտ խի՞ չեք խոսում, տուն եք ուղարկում»:

Ինքն ասել է, թե նրան որպես «լավ տղա է ճանաչում»: Բայց Մուշեղը հայհոյանքներ է տվել, որից վիրավորված՝ ինքը մեկ անգամ աջ ձեռքով հարվածել է նրան, հարվածը նրա մարմնի որ մասին է դիպել՝ չգիտի:

Հետո փողոցում մոտեցել են Մուշեղին ու առաջարկել են, որ տուն գնա, իսկ նա նորից հայհոյել է իրեն, ինքը զայրացել ու բռունցքով մեկ անգամ հարվածել է նրա դեմքին: Մուշեղը մի քանի քայլ է արել, ընկել է բետոնե առվի մեջ ու կորցրել է գիտակցությունը:

Տուժող Մուշեղը հայտնել է, թե դեպքի օրվա երեկոյան ինքը, կինը, զոքանչը տանը հաց են կերել, ինքն ու զոքանչը խմել են իր քաշած օղուց: Ինքը խմել է հինգ բաժակ:

Ժամը 23-ի սահմաններում տանից դուրս է եկել ու տեսել է իրենց թաղի տղաներից Շավարշին, Վարդանին, Սմբատին, նրանք Վարդանի մեքենայի մեջ նստած էին:

Ինքը մեքենայի դուռը բացել, նստել ու, քանի որ մեքենայի մեջ երաժշտության ձայնը շատ բարձր էր, ասել է. «Էս ուշ ժամին ի՞նչ եք մուզիկայի ձենը բարձր միացրել մեր հայաթում, հը՞ն»: Իրենց միջև վիճաբանություն է առաջացել, Շավարշը բռունցքով հարվածել է իր դեմքին…

Տուժողը նշել է, որ իրեն վնասվածքներ պատճառել է Շավարշը, պատճառը իր հայհոյանքներն են եղել, ինքը պահի տակ ներվայնացել է: Ինքը «առայժմս» քաղհայցի պահանջ չի ներկայացնում ու չի ցանկանում, որ Շավարշը ենթարկվի քրեական պատասխանատվության, քանի որ իրենք հարևաններ են, միայն ցանկանում է, որ նա հոգա իր հիվանդանոցային հետագա ծախսերը:

Նախաքննության ընթացքում Մուշեղը տվել է հակասական ցուցմունքներ, ասել է, թե վնասվածքները ստացել է ընկնելու հետևանքով: Մեկ այլ ցուցմունքում նա ասել է, թե Շավարշը «աբիժնիկ» է մնացել իրենից, դրա համար հետևել է իրեն ու գյուղի հրապարակում խփել է իր քթի շրջանին, որի հետևանքով իր դեմքին սպի է մնացել:

Մուշեղը հայտնել է, թե Շավարշը հատուցել է իր հիվանդանոցային ծախսերը՝ 500 հազար դրամի չափով:

Դատարանը հաստատված է համարել, որ Մուշեղ Թ.-ի առողջությանը դիտավորությամբ ծանր վնաս է պատճառել Շավարշ Մ.-ն:

Դատարանը հաշվի է առել, որ ամբաստանյալն ընտանիքի միակ կերակրողն է, նրա խնամքին են երկու մանկահասակ երեխաները՝ ծնված՝ 2015 և 2016 թվականներին, կինը, վատառողջ մայրը:

Դատարանն արձանագրել է, որ տուժողը ամբաստանյալի նկատմամբ որևէ պահանջ առաջ չի քաշել, բողոք չի ունեցել:

Հանցագործության կատարման հարցում դեր է խաղացել նաև տուժողի վարքագիծը:

Շավարշ Մ.-ն մեղավոր է ճանաչվել ՀՀ քրեական օրենսգրքի 112 հոդվածի 1-ին մասով, դատապարտվել է 3 տարի ազատազրկման, նրա նկատմամբ պայմանական դատապարտություն է կիրառվել, ու սահմանվել է 3 տարի փորձաշրջան: