«Չորրորդ իշխանության» 3 հրապարակումների մասով ոստիկանությունը նյութեր է նախապատրաստում

Երեկ «ՉԻ»-ն ՀՀ ոստիկանության Արթիկի բաժնի պետ, ոստիկանության գնդապետ Տ. Ա. Պետրոսյանի ստորագրությամբ գրություն է ստացել, որտեղ ասված է. «2016 թվականի սեպտեմբերի 1-ին Ձեր կայքէջում տպագրվել են «Գյուղապետը ուռճացրել է ընտրողների ցուցակները», «Գյուղի մոդելով` ողջ հանրապետությունում», ինչպես նաեւ

«Չորրորդ իշխանություն» օրաթերթում տպագրվել է «Հաղորդում հանցագործության մասին» վերտառությամբ հոդվածները, որոնցում անդրադարձ է կատարվել Շիրակի մարզի Սարատակ համայնքի պատասխանատու պաշտոնատար անձի կողմից ընտրողների ցուցակները կազմելու համար սահմանված կարգը խախտելով կեղծիքներ կատարելուն։

Դեպքի առթիվ ՀՀ ոստիկանության Արթիկի բաժնում նախապատրաստվում են նյութեր։

ՀՀ քրեական դատավարության 179-րդ հոդվածի 2-րդ մասի պահանջներին համապատասխան, խնդրվում է ՀՀ ոստիկանության Արթիկի բաժին ներկայացնել հանցագործության մասին հաղորդումը հաստատող նյութերը եւ դրանք տրամադրող անձանց տվյալները»։

«ՉԻ» խմբագրակազմը օրերս կորոշի՝ համագործակցել ոստիկանության հետ, թե՞ ոչ, օգնել նրան նյութերի նախապատրաստման ընթացքում, թե՞ օգտվել իր սահմանադրական իրավունքից, որը բարձր պաշտպանության տակ է առնում աղբյուրի ինստիտուտը։

Հավելենք նաեւ, որ այս գյուղի մասին հրապարակումներից ոստիկանությունը բաց է թողել «Հանցավորության դինամիկան կամ վիճակագրական նախընտրական կեղծիքներ» վերնագրով հրապարակումը։ Իսկ այս հրապարակման մեջ խոսքն այն մասին էր, որ ՀՀԿ-ական գյուղապետը, տարիներ շարունակ կեղծելով ընտրացուցակները, կեղծել է նաեւ ընտրողների հասցեները` արհեստականորեն ավելացնելով գյուղի նպաստառու ընտանիքների թիվը։ Հիշեցնենք, որ ըստ գյուղի նպաստառուների ցուցակի, գյուղում որեւէ նորմալ ընտանիք չկա, նույնիսկ երիտասարդ ամուսինները, ըստ փաստաթղթերի, ամուսնալուծված են։ Գյուղի ընտանիքների մայրերի ճնշող մեծամասնությունը միայնակ է եւ ապրում է ամենատարբեր հասցեներում, նույնիսկ գոյություն չունեցող հասցեում։

«ՉԻ»