Ինչ է ենթադրում Զինծառայության մասին օրենքի նոր նախագիծը

Lragir.am / Ազգային ժողովը քննարկում է “Զինվորական ծառայության և զինծառայողի կարգավիճակի մասին” օրենքի նախագիծը:
Պաշտպանության նախարար Վիգեն Սարգսյանն իր խոսքում ասաց, որ նախագծով փոփոխություններ են կրել պարտադիր զինվորական ծառայությունից ազատման և տարկետման տրամադրման հետ կապված հարաբերությունները:
Զորակոչի հայտարարման իրավասությունը վերապահվում է ՀՀ կառավարությանը, իսկ տարկետման մեծ մասը փոխարինվել է արտոնություններով: Արտոնությունների ձևական համակարգն էլ, ըստ նախարարի, փոխարինվել է բովանդակային արտոնություններով:
«Խոսքը գրեթե բոլոր դեպքերում վերաբերում է ընտանեկան վիճակից ելնելով՝ հատուկ ծառայության պայմաններով քաղաքացիների խմբին: Նրանք են ծնողազուրկ, հաշմանդամություն ունեցող ծնողներ ունեցող զինծառայողները: Երկու լրացուցիչ արձակուրդ է նախատեսվում այդպիսի զինծառայողների համար, ինչպես նաև մարտական հերթապահության մեջ նրանց ներգրավումը հնարավոր է միայն իրենց ցանկությամբ: Եթե նախկինում մենք ասում էինք, որ այդ կատեգորիան պետք է ծառայի տնից 150 կմ հեռավորությամբ շառավղով, և դա ոչինչ չէր նշանակում, որովհետև Տավուշում կամ Գեղարքունիքում ապրող զինծառայողը կարող էր հայտնվել առաջնագծում, այսօր մենք բովանդակային արտոնություն ենք տալիս նրանց»,- մանրամասնեց նախարարը:
Ինչ վերաբերում է ուսման տարկետմանը, նախարարն ասաց, որ բարձրագույն կրթություն ստացողը կարող է տարկետումից օգտվել, եթե այնուհետև պատրաստ է ծառայել որպես սպա՝ ստանալով սպայի աշխատավարձ եւ ուսման վարձի փոխհատուցում:
«Թափանցիկության ու արդարության ապահովման համար մեծածավալ փոփոխություններ են նախատեսվում զորակոչի ենթակա անձանց և զինծառայողների առողջական վիճակի հետազոտման և բժշկական փորձաքննության գործընթացում: Հետազոտման կարգերը, զինվորական ծառայության հետ խնդիրներ առաջացնող հիվանդություների ցանկը սահմանում է ՀՀ կառավարությունը: Այսինքն՝ եթե մինչ այս այդ խնդիրները լուծվում էին պաշտպանության նախարարի հրամանով, մենք բարձրացնում ենք սրանց իրավական կարգավորման մակարդակը», ասաց Վիգեն Սարգսյանը:
Նախարարը նաև ասաց, որ սպայական կազմի համար հիպոթեքային վարկ ստանալու մատչելի ծրագիր է գործելու:
«Սպան ծառայության ընթացքում մեկ անգամ կարողանալու է օգտվել այսօր Հայաստանում եղած բոլոր մատչելի հիպոթեքային ծրագրերից շատ ավելի մատչելի պայմաններով հիպոթեքային ծրագրից: Դրա շրջանակներում հաշվարկն այնպիսին է, որ նա միայն մայր գումարն է մարելու, որովհետև տոկոսները սուբսիդավորվելու են պետության կողմից և եկամտահարկի վերադարձի միջոցով գրեթե հավասարվեու են զրոյի: Եվ նա 20 տարվա ընթացքում միայն մարելու է մայր գումարը, ընդ որում, մայր գումարի 90 տոկոսը, որովհետև 10 տոկոս կանխավճարը մենք հատուցելու ենք Պաշտպանության նախարարության կողմից՝ իր ելքային նպաստի հաշվին: Սա մինչ օրս եղած ամենամատչելի հիպոթեքային ծրագիրն է, որին միանալու երրորդ կամ չորրորդ տարում սպան կարող է արդեն բնակարան ունենալ», մանրամասնեց նա: