«Տրտնջալ չեմ սիրում». Լիլի Սարգսյան / լուսանկարներ

«Միսս Արմենիա 2017» տիտղոսակիր Լիլի Սարգսյանն արդեն Չինաստանում է, որտեղ նոյեմբերի 18–ին կմասնակցի «Միսս աշխարհ» գեղեցկության մրցույթին։ Tert.am Life–ի հետ զրույցում Լիլին պատմել է, թե ինչպես է անցնում առօրյան Չինաստանում, ինչ բարդություններ է հաղթահարել և ինպես է նախապատրաստվում «Միսս աշխարհին»։

«Այստեղ ամեն բան շատ հրաշալի և հետաքրքիր է։ Այցելել ենք տեսարժան վայրեր։ Օրեր առաջ չինական ներկայացման ենք հաճախել, այնքան տպավորիչ էր։ Մարդիկ էլ բարի են և հյուրընկալ։ Առաջիկայում այցելելու ենք տարբեր քաղաքներ և տեսարժան վայրեր, ծանոթանալու ենք այստեղի մշակույթին»,– ասաց Լիլին։

17–ամյա աղջիկը տրտնջալ չի սիրում, սակայն խոստովանեց, որ սկզբնական փուլում իր համար բարդ էր։ Լիլին առաջին անգամ է ճամփորդում, դեռահաս աղջկան բաժին է հասել միայնակ ճամփորդությունը, ինչն էլ փոքր–ինչ դժվարացրել է իրավիճակը։

«Սկզբնական շրջանում դժվար էր։ Ես շուտ չեմ ադապտանում։ Օտար երկրում, անծանոթ մարդկանց միջավայրում դժվար է միայնակ, բայց հիմա արդեն հարմարվել եմ։ Այստեղ մեր անվտանգությունն ապահոված է։ Բացի այդ, շուտով ինձ կմիանան մարդիկ «Միսս Արմենիայի» անձնակազմից»,– նշեց երիտասարդ աղջիկը։

Ավելի վաղ «Միսս Արմենիա» հիմնադրամի նախագահ Գոհար Հարությունյանը նշել էր, որ Լիլին ունի որոշակի խնդիրներ, որոնք ակնկալում է շտկել մինչև նրա Չինաստան մեկնելը։ Մեր մասնակցից հետաքրքրվեցինք` իր կարծիքով հաջողվե՞լ է շտկել խնդիրները։

«Խնդիրը կաշկանդվածությունն էր։ Քանի որ առաջին անգամ էի այդպիսի բեմում, մի փոքր կաշկանդված էի։ 1 ամսվա ընթացքում փորձել ենք լուծել այդ խնդիրը։ Աշխատել եմ պարուսույցի հետ, նաև աշխատել ենք քայլվածքիս, խոսքիս, լեզուների իմացության ուղղությամբ։ Բավականին մեծ աշխատանք ենք արել։ Այստեղ շարունակելու ենք աշխատել քայլվածքիս ուղղությամբ, փորձեր ենք անելու բեմում, նաև պարային շարժումներ ենք բեմադրելու»,– ասաց նա։

Լիլիի խոսքով` առօրյա կյանքում ինքն ավելի հանգիստ է, կաշկանդված չէ, պարզապես, հուզմունքը ամեն մեկի մոտ յուրովի է դրսևորվում, իր մոտ արտահայտվել էր կաշկանդվածությամբ։ Ըստ նրա` ինքնավստահության պակաս ինքը չունի. «Ես վստահում եմ իմ ուժերին, դա է պատճառը, որ այսօր այստեղ եմ։ Հիմա հուզված չեմ։ Դրանում կհամոզվեք նոյեմբերի 18–ին»։

Լիլին նշեց, որ շփվում է «Միսս աշխարհի» մասնակից բոլոր աղջիկների հետ, սակայն առավել մտերիմ է Վրաստանի ներկայացուցչի հետ։ Անդրադառնալով մրցակիցներին` Լիլին ասաց. «Մասնակից աղջիկները շատ գեղեցիկ և հաճելի են։ Այստեղ գտնվելն արդեն մեծ հաղթանակ է բոլորիս համար։ Ինչ վերաբերում է մրցակիցներին` ես մրցակիցներ չեմ փնտրում, ամեն բան անում եմ, որպեսզի լինեմ լավագույնը և չփնտրեմ մրցակից»։

Լիլիի հասցեին հնչած քննադատությունները նրան չեն ընկճել, ասում է` ճիշտ հակառակը։ «Այդ ամենը միայն մեծացնում էր ավելի լավ ներկայանալու ցանկությունս։ Բնական է, որ պետք է քննադատեին, բոլորն ունեն իրենց կարծիքը և իրենք են որոշում իրենց սահմանները։ Որքան էլ քննադատեին, և ես ընկճվեի, ոչինչ չէր փոխվելու, այդ պատճառով էլ չեմ ընկճվում»,– նշեց նա։

Իր ապագան 17–ամյա աղջիկը տեսնում է մոդելային ասպարեզում, ինչպես նաև շարունակում է զբաղվել դիզայնով։ «Ինձ արդեն տեսնում եմ մոդելային ասպարեզում, սակայն կփորձեմ նաև այլ ոլորտներում ճանաչել ինձ նորովի։ Հիմա սովորում եմ դիզայնի բաժնում։ Կարծում եմ` դեռ այս ոլորտում կփորձեմ ինձ»,– եզրափակեց նա։