«Հայաստանը հայտնվել է խաչմերուկում». ԱՄՆ դեսպանի հետաքրքիր հարցազրույցը

Առաջին / «Ամերիկայի ձայնը» զրուցել է Հայաստանում Միացյալ Նահանգների արտակարգ և լիազոր դեսպան Ռիչարդ Միլսի հետ: Բովանդակալից, բաց և քողարկված ուղերձներով հարուստ ծավալուն հարցազրույց է, որտեղ Միլսը, Հայաստանի բարեկամի հայացքով, մեր հասարակությունը համարում է արևմտյան: Սա պարտավորեցնող հանգամանք է, ինչ-որ տեղ ըմբռնումով մոտեցում, որ Հայաստանի անդամակցությունը ԵՏՄ-ին պարտադրված, ոչ քաղաքակրթական ընտրության հետևանք է: ԱՄՆ դեսպանը մեծ սիրով խոսում է Հայաստանի ձեռքբերումների, ամերիկյան ներդրումների մասին, սակայն դիվանագիտական նրբանկատությամբ չի շրջանցում այն պրոբլեմները, որոնք մարտահրավեր են Հայաստանի համար:

«Կա այն ընկալումը, թե հասարակության մեջ չկան հավասար պայմաններ։ Խոսքը դատական համակարգից կամ պետական ծառայություններից օգտվելու դեպքերին է վերաբերում։ Եթե այլ բառերով սա բնորոշենք, դա թափանցիկության բացակայության կամ կոռուպցիայի առկայության խնդիրն է»,-ասել է Միլսը` ամերիկյան օպտիմիզմով նկատելով, որ Հայաստանում ընդունում են դիտողությունները։ Մյուս կողմից` չենք կարող չնկատել, որ կոռուպցիայի խնդիրն այդպես էլ չի իջնում հայ-ամերկյան երկխոսության օրակարգից, ինչն, անկախ դեսպանի դիվանագիտական ձևակերպումներից, մեզ հիմք է տալիս պնդելու, որ Հայաստանում, իրականության մեջ, ոչ թե հակակոռուպցիոն պայքար է տարվում, այլ գործ ունենք դրա իմիտացիայի հետ: Նույն պնդումը կարելի է անել ընտրությունների մասով:

Քվեարկության օրը Հայաստանում, կարծես թե, ամեն ինչ լավ է կազմակերպվել, ինչը տեղավորվում է Սերժ Սարգսյանի «անցնցում ընտրությունների» կոնցեպցիայի տրամաբանության մեջ, սակայն ընտրական գործընթացի որակը հեռու է բավարար լինելուց և դա նկատելի է նաև Վաշինգտոնում: «Սակայն քվեարկությանը նախորդող ժամանակահատվածում, անշուշտ տեղի ունեցան երևույթներ, որոնք անընդունելի էին՝ ընտրակաշառքների հետ կապված դեպքեր, աշխատողների նկատմամբ ճնշումներ, որոշ թեկնածուների օգտին քվեարկելու պարտադրանք։ Դրանք բոլորը խիստ մտահոգիչ հարցեր էին»,-«Ամերիկայի ձայնին» ասել է Ռիչարդ Միլսը:

շարունակությունը՝ կայքում