«Ի՞նչ իրավունքով են օգտագործել իմ ընտանիքի նկարը». Նարբե Պողոսյանը դատի կտա Daily Mail-ին

Դերասան-ամուսիններ Նարբե Պողոսյանը եւ Աստղիկ Ալավերդյանը տեղյակ չեն եղել, որ իրենց ընտանեկան ընթրիքի ժամանակ լուսանկարում են Daily Mail պարբերականի համար: NEWS.am STYLE-ի հետ զրույցում, անդրադառնալով բրիտանական կայքի՝ Հայաստանում արջերի պահման պայմանների մասին հոդվածին, ասաց դերասանը:

Նրա խոսքով՝ իրենց ընտանեկան անմեղ ընթրիքը ռեստորանում դարձել է քննարկման առարկա.

«Մենք պարզապես ճաշում էինք, երբ մեզ եվրոպացիներ մոտեցան եւ խնդրեցին լուսանկարել՝ ցույց տալու համար, թե ինչ հաճելի վայրեր կան Հայաստանում: Առայժմ չեմ հայտնում այն մարդու անունը, որը միջնորդեց, խնդրեց, որպեսզի մենք համաձայնենք լուսանկարվել, բայց ես չգիտեի, որ իմ ընտանիքի լուսանկարն օգտագործվելու է Հայաստանը վարկաբեկող հոդվածի ներքո: Եթե եվրոպացին ինձ ասեր, որ անգլիական թերթում գրելու է, որ Հայաստանում կենդանիները սոված են, ես այդ ֆոտոխցիկը կջարդերի նրա գլխին, քան կթողնեի, որ նման վարկաբեկող բան գրեն: Ինձ խաբեցին, ասացին՝ ընդամենը նկարում են, մենք էլ մտածեցինք՝ ի՞նչ խնդիր կա, նստած հաց էինք ուտում: Ի՞նչ իրավունքով են իմ նկարը դրել այդ նյութի տակ»:

Նարբեն վստահ է, որ եթե իրենք ճանաչված չլինեին, գուցե հոդվածն այդքան մեծ արձագանք չստանար: Այժմ դերասանը բանակցությունների մեջ է լուսանկարելու համար միջնորդած անձի հետ, եւ եթե վերջինը քայլեր չձեռնարկի, ապա Նարբե Պողոսյանը դատի կտա Daily Mail-ին եւ կպահանջի հեռացնել իր ընտանիքի լուսանկարները:

Մեր հարցին, թե, առհասարակ, դերասանն ի՞նչ կարծիք ունի կենդանիներին նման պայմաններում պահելու վերաբերյալ, Նարբեն չցանկացավ պատասխանել. «Դա չէ մեր քննարկման թեման, այլ այն, որ ինձ խաբել են»:

Հիշեցնենք, որ Daily Mail-ում հոդված է հրապարակվել այն մասին, որ Հայաստանում արջերին ռեստորանների բակում պահում են վանդակների մեջ: Հոդվածին կից տեղադրվել են Նարբեի եւ Աստղիկի լուսանկարներն իրենց որդու հետ: