Եվրախորհուրդը ճնշում է սկսել Ադրբեջանի դեմ. Բաքվին ժամանակ է տրվել

Եվրոպայի խորհրդի նախարարների կոմիտեն պաշտոնապես Ադրբեջանին տեղեկացրել է իրավական գործողություններ սկսելու մտադրության մասին: Այն պայմանավորված է Իլգար Մամեդովի գործով Մարդու իրավունքների եվրոպական դատարանի որոշման իրականացումը ապահովելու անհրաժեշտությամբ:

Ինչպես հաղորդում է ադրբեջանական «Թուրան» լրատվական գործակալությունը, հոկտեմբերի 25-ին կայացած Նախարարների կոմիտեի նիստի արդյունքների վրա հրապարակված մամուլի հաղոդագրությունում նշված է, որ ընդդիմադիր քաղաքական գործիչ Իլգար Մամեդովի ձերբակալությունն ու կալանքի տակ երկար ժամանակ պահելը ուղեկցվել են Մարդու իրավունքների եվրոպական կոնվենցիայի մի շարք հոդվածների խախտմամբ:

Դատարանը, մասնավորապես, ընդգծել է, որ ընդդիմադիր գործչին հետապնդելու և ձերբակալելու պատճառ եղել է նրան լռել ստիպելը կամ Ադրբեջանի իշխանություններին քննադատելու համար պատժելը՝ խախտելով Կոնվենցիայի 18-րդ հոդվածը (իրավունքների նկատմամբ սահմանափակումների կիրառման սահմաններ): Մինչ օրս ՄԻԵԴ-ը ճանաչել է հինգ անձանց նկատմամբ 18-րդ հոդվածի խախտում, և բոլոր այդ դեպքերում՝ բացի Իլգամ Մամեդովից, դիմումատուներն ազատ են արձակվել: Սակայն ավելի քան երեք տարի անց Մամեդովը շարունակում է բանտում մնալ: «Կոմիտեն, այսօրվա ժամանակավոր բանաձևի համաձայն, Ադրբեջանին մինչև նոյեմբերի 29-ը իր կարծիքը գրավոր տարբերակով ներկայացնելու հնարավորություն է ընձեռել: Եթե դեռևս որոշում չընդունվի, հերթական ժամանակավոր բանաձևը Նախարարների կոմիտեն կքննարկի դեկտեմբերի 5-ին»,- նշված է հայտարարությունում:

Ըստ ադրբեջանցի իրավապաշտպան Ռասուլ Ջաֆարովի՝ Նախարարների կոմիտեն նույնիսկ ուշացել է նշված գործընթացի մեկնարկի հարցում: «Գուցե, եթե այն կյանքի կոչվեր դատական որոշման հրապարակումից անմիջապես հետ կամ որոշ ժամանակ անց, ապա Իլգար Մամեդովն արդեն ազատության մեջ կլիներ: Կոմիտեի որոշման համատեքստում Ադրբեջանի իշխանություններին կոչ եմ անում ազատ արձակել Իլգար Մամեդովին: Դա Ադրբեջանի ազգային շահերի տեսանկյունից ճիշտ քայլ կլիներ»,- ասել է Ջաֆարովը:

«ReAl» շարժման առաջնորդ Իլգար Մամեդովը ձերբակալվել է 2013 թ-ի հունվարի 23-24-ին Իսմաիլը քաղաքում տեղի ունեցած իրադարձությունների առնչությամբ: Մամեդովին մեղադրել են զանգվածային անկարգություններ կազմակերպելու, ոստիկանությանը դիմադրություն ցույց տալու մեջ՝ դատապարտելով 7 տարվա ազատազրկման: 2014 թ-ի մայիսին ՄԻԵԴ-ը վճիտ էր կայացրել առ այն, որ Իլգար Մամեդովի ձերբակալությունը և կալանքի տակ պահելը խախտել են Եվրոպական կոնվենցիայի շատ դրույթներ՝ պահանջելով վերջինիս ազատ արձակել: