«Ցավոտ», բայց անկեղծ խոստովանություն

Առաջին / Նախօրեին Սերժ Սարգսյանը դասախոսություն է կարդացել Հայաստանի Հանրապետական կուսակցության «Անդրանիկ Մարգարյան» քաղաքական դպրոցում, որտեղ ի թիվս այլ հարցերի՝ նախագահը անդրադարձել է նաև Արցախի հարցին՝ նշելով, որ լուծումը ցավոտ է լինելու. «Ցավոտ լուծում է լինելու Արցախի հարցում: Չի կարող առանց փոխզիջումների լուծում լինել»: Ընդ որում, Սերժ Սարգսյանը խոստացել է առաջիկայում այս թեմայով անկեղծ զրույց ունենալ դպրոցի ունկնդիրների հետ:

Հետաքրքիր օրինաչափություն է նկատվում՝ Սերժ Սարգսյանը ավելի անկեղծ, ըստ էության՝ ռեալ պոլիտիկի տրամաբանությունից բխող հայտարարություններ հնչեցնում է հենց, այսպես կոչված, ոչ պաշտոնական հարթակներում: Մի կողմից՝ նա այդ հարթակներն օգտագործում է արտաքին կենտրոններին կարևոր ուղերձներ հասցնելու համար, մյուս կողմից՝ ոչ պոպուլյար ասելիքը մատուցում է հնարավորինս ոչ պաշտոնական ձևաչափում՝ գիտակցված նսեմացնելով սեփական խոսքի արժեքը:

Արցախի հարցում «ցավոտ լուծման» մասին խոստովանությունը, ինչքան էլ դա խորթ լինի ոմանց ականջներին, բխում է ռեալ պոլիտիկի տրամաբանությունից և դասվում է հենց ոչ պոպուլյար հայտարարությունների շարքին: Հայաստանի իշխանության վերնախավում հասկանում են, որ վաղ թե ուշ ԼՂ խնդրում անհրաժեշտ է գնալ քաղաքական խիզախ լուծումների, հակառակ պարագայում Հայաստանը կարող է բաց թողնել կարգավորման հարաբերականորեն պատեհ առիթը, մյուս կողմից՝ մեծացնելով պատերազմի վերսկսման ռիսկերը:

Պատահական չէ, որ Սերժ Սարգսյանը, Էդվարդ Նալբանդյանը՝ պաշտոնյաներ, ովքեր անմիջական մասնակցություն են ունենում կարգավորման գործընթացին, իրենց «սթափեցնող» հայտարարություններով պարբերաբար հասարակությանը նախապատրաստում են հնարավոր փոխզիջումներին: Էդվարդ Նալբանդյանը դա արեց սեպտեմբերին՝ Հայաստան-Սփյուռք համաժողովի շրջանակներում: ՀՀԿ դպրոցում Սերժ Սարգսյանի ընդամենը մեկ նախադասությունը՝ իր բովանդակությամբ և քաղաքական նշանակությամբ, համարժեք էր Նալբանդյանի այդ ելույթին:

շարունակությունը՝ կայքում