Ընկերոջ կնոջ հասցեին կատարած արտահայտությունը վերածվել է վեճի ու սպանության

Լոռու մարզի ընդհանուր իրավասության դատարանի դատավճռով ամբաստանյալ Հրանտ Ասատրյանը մեղավոր է ճանաչվել Հայաստանի Հանրապետության քրեական օրենսգրքի 104-րդ հոդվածի 1-ին մասով՝ սպանություն, և դատապարտվել 11 տարվա ազատազրկման:
Դատարանը մասնակի է բավարարել տուժողի իրավահաջորդի ներկայացրած 2.000.000 ՀՀ դրամի քաղաքացիական հայցի պահանջը՝ ամբաստանյալից պետք է բռնագանձվի 600.000 ՀՀ դրամ հօգուտ տուժողի իրավահաջորդի՝ որպես տուժող Հայկ Վարդումյանի հուղարկավորության հետ կապված ծախսերի հատուցում:
Հայցի մնացած մասով կողմին իրավունք է վերապահվել այդ մասով ՀՀ քաղաքացիական դատավարության օրենսդրությամբ սահմանված կարգով դիմելու դատարան:
Ըստ մեղադրանքի, ամբաստանյալը 2016 թվականի նոյեմբերի 30-ին` ժամը 15-ի սահմաններում, Ալավերդի քաղաքի բնակիչ Արամայիս Բեժանյանին պատկանող բնակարանում վերջինիս և համաքաղաքացի Հայկ Վարդումյանի հետ հերթական անգամ օգտագործել են ալկոհոլ, որի ընթացքում Հայկ Վարդումյանը գտնվելով ալկոհոլային հարբածության վիճակում, ցանկություն է հայտնել Արամայիս Բեժանյանի հետ փաստական ամուսնական հարաբերությունների մեջ գտնվող կնոջ հետ ունենալ սեռական հարաբերություն։
Հիշյալ հանգամանքից ելնելով, վիճաբանություն է առաջացել Հայկ Վարդումյանի և Հրանտ Ասատրյանի միջև, որի ժամանակ վերջինս նախատել է Հայկ Վարդումյանին` ընկերոջ կնոջ հասցեին կատարած արտահայտության համար, որից հետո առաջացած փոխադարձ վիճաբանության ժամանակ Հրանտ Ասատրյանը Հայկ Վարդումյանին ապօրինաբար կյանքից զրկելու դիտավորությամբ, նախ հյուրասենյակի սեղանին դրված օղու շշով մեկ անգամ ուժգին և շեշտակի հարվածել է վերջինիս դեմքին՝ պատճառել առողջության ծանր վնասի հատկանիշներ պարունակող դեմքի դիմային շրջանի` զույգ ակնակապճային շրջանների, քթի հիմային շրջանի, միջհոնքային շրջանի արյունազեղումներ, քերծվածքներ, արյունակուտակներ, ակնագնդերի արյունալեցություն /ակնոցի համախտանիշ/, քթի ոսկրերի բազմաբեկորային կոտրվածքներ, գանգի հիմի ոսկրերի առաջային գանգափոսի շրջանի կոտրվածք, գլխուղեղի կարծրենու, նրբենու և ուղեղանյութի արյունազեղումներ ու նրանցով պայմանավորված գանգուղեղային փակ, բութ տրավմա, որի հետևանքով Հայկ Վարդումյանը վայր է ընկել գետնին, իսկ Հրանտ Ասատրյանը մոտենալով գետնին վայր ընկած վիճակում գտնվող Հայկ Վարդումյանին, շարունակել է բռունցքներով բազմաթիվ հարվածներ հասցնել նրա մարմնի տարբեր մասերին` պատճառել առողջության թեթև վնասի հատկանիշներ չպարունակող ձախ վերհոնքային շրջանի թվով 1, աջից` ճակատ-գագաթային շրջանի և ճակատ-քունքային շրջանի 1-ական, ձախից ճակատ-քունքային շրջանի թվով 1, աջ ականջախեցու թվով 1 քերծվածքներ, աջից` վերհոնքային շրջանի և ձախից` գլխի գագաթա-քունքային շրջանի 1-ական սալջարդ վերքեր, ծոծրակային շրջանի թվով 1 կտրած վերք։
Նույն ժամանակ Հայկ Վարդումյանն ստացած ծանր մարմնական վնասվածքներից մահացել է:
Դատարանը գտել է, որ ամբաստանյալ Հրանտ Ասատրյանը կատարել է ՀՀ քրեական օրենսգրքի 104-րդ հոդվածի 1-ին մասով իրեն մեղսագրվող հանցավոր արարքը և որ ամբաստանյալին առաջադրված մեղադրանքը ապացուցված է:
Դատարանն արձանագրել է, որ ամբաստանյալ Հրանտ Ասատրյանի պատասխանատվությունը և պատիժը մեղմացնող հանգամանքներ չկան, իսկ նրա պատասխանատվությունը և պատիժը ծանրացնող հանգամանք է համարվում հանցագործությունը ալկոհոլային հարբածության վիճակում կատարելը:
Դատարանը գտել է նաև, որ տուժողի իրավահաջորդի ներկայացրած քաղաքացիական հայցը ենթակա է բռնագանձման միայն հուղարկավորության ծախսերի մասով: 600.000 ՀՀ դրամ գումարի ծախսը դատարանը համարել է թաղման արարողության համար անհրաժեշտաբար ծախսվող ողջամիտ գումար:
Դատարանն արձանագրել է, որ նաև տուժողի գերեզմանի կառուցապատման հետ կապված ծախսերը բռնագանձելու պահանջը դուրս է քրեական դատավարությունում քննվող քաղաքացիական հայցի առարկայի սահմաններից: Դատարանը գտել է, որ դրանց հատուցման հետ կապված հարցերը ենթակա են լուծման ոչ թե քրեական դատավարության, այլ քաղաքացիական դատավարության կարգով հարուցված քաղաքացիական հայցի շրջանակներում: