Բանտերում «քրեական օրենքներին» չենթարկվողներին տանում են «համասեռամոլների» խուց. Դիտորդ խմբի զեկույց

Հայաստանի քրեակատարողական հիմնարկներում «քրեական օրենքներին» չենթարկվող կամ դրանք խախտած ազատազրկված անձանց պահում են առանձին խցերում: Այս մասին նշված է ՀՀ արդարադատության նախարարության քրեակատարողական հիմնարկներում եւ մարմիններում ուսումնասիրությունների արդյունքում հասարակական դիտորդական խմբի պատրաստած 2016 թվականի տարեկան զեկույցում:

Զեկույցում նշվում է, որ նշված խմբին են դասվում այն ազատազրկված անձինք, որոնք հրաժարվում են ենթարկվել «հանցագործ աշխարհի» կողմից ընդունված չգրված կանոններին («գողական օրենքներին») կամ խախտել են դրանք. «Այդ խցերը կոչվում են «թռածների եւ արվամոլների» խցեր, իսկ այդ ազատազրկված անձանձ թե՛ ՔԿՀ-ների աշխատակիցների, թե՛ մյուս ազատազրկված անձանց կողմից տրվում են վիրավորական պիտակավորումներ եւ նրանք արժանանում են նվաստացնող վերաբերմունքի։ Մասնավորապես, նրանք ներգրավվում են մյուսների համար նվաստացուցիչ համարվող այնպիսի աշխատանքներում, ինչպիսիք են, օրինակ՝ կոյուղու եւ տարածքի մաքրման աշխատանքները»,- նշված է զեկույցում:

Զեկույցին նվիրված ասուլիսի ժամանակ բանախոսները նշեցին, որ այդ խմբին են դասվում հիմնականում սեռական բնույթի հանցագործություններ կատարելու համար մեղադրվող կամ ազատազրկված անձինք, որոնք «կամավոր-պարտադիր» սկզբունքով գրավոր դիմում են ՔԿՀ վարչակազմին` իրենց «թռածների եւ ԼԳԲՏ անձանց» խուց տեղափոխելու խնդրանքով:

Հասարակական դիտորդական խմբի անդամների փոխանցմամբ, իրենց մշտադիտարկման արդյունքները ցույց են տալիս, որ այն դեպքում, երբ այդ անձինք գտնվում են այլ ազատազրկվածների հետ միեւնույն խցում, նրանք ենթարկվում են հոգեբանական ճնշումների եւ ֆիզիկական բռնության, որոշ դեպքերում նաեւ՝ սեռական բռնությունների, ոտնձգությունների («փչացվում են») իրենց խցակիցների կողմից: