Սպանվել է ուկրաինական զինուժի լեյտենանտ Ակուեւան

ՌԴ նախագահ Վլադիմիր Պուտինի վրա ենթադրյալ մահափորձի հեղինակ, ծագումով Չեչնիայից Ադամ Օսմաեւը վիրավոր է, բայց գիտակից: Նրա կինը` Ուկրաինայի ազգային հերոս, ուկրաինական զինված ուժերի լեյտենանտ Ամինա Ակուեւան սպանվել է: Այս մասին հայտնում են ուկրաինական ԶԼՄ-ները` հղում անելով Գերագույն Ռադայի պատգամավոր, Ուկրաինայի ԱԳՆ խորհրդական Անտոն Գերաշենկոյին, որն այս մասին նաեւ գրել է սոցցանցի իր էջում:

Ամինա Ակուեւայի մեքենան կրակահերթի է ենթարկվել մերձկիեւյան Գլեվախա գյուղի երկաթուղու մոտակայքում, կրակել են թփերի հետեւից: Ակուեւան մահացել է տեղում, իսկ նրա ամուսինը` չեչենական ծագմամբ Ադամ Օսմաեւը վիրավոր է:

Սա առաջին մահափորձը չէ ` ուղղված այս զույգի դեմ: Ամենաթարմ դեպքն այս տարվա ամռանն է եղել: Հուլիսի 1-ին, ֆրանսիացի լրագրողի անվան տակ հանդես եկած Ուկրաինայի քաղաքացի Ալեքսանդր Դաքարը մի քանի անգամ կրակել էր Օսմաեւի վրա` իր իսկ մեքենայում: Հենց այդ պահին Ամինա Ակուեւան, որը պատերազմել է Դոնբասում` Դուդաեւի անվան ճակատում, պատասխան կրակ էր բացել մարդասպանի վրա, վիրավորել նրան, ինքն էլ ստացել հրազենային վիրավորում:

34-ամյա Ամինա Ակուեվան հարուստ կենսագրություն ունի: Բացի Դոնբասի մարտերում Ջոխար Դուդաեւի ճակատում անձնուրաց կռիվներ մղելուց ու միջազգային խաղաղասեր գնդի մամուլի քարտուղարը լինելուց, նա նաեւ «Ազատ Կովկաս» միջազգային հասարակական-քաղաքական շարժման ներկայացուցիչն էր Ուկրաինայում, Լուգանսկի եւ Դոնեցկի ինքնավար հանրապետություններում հակաահաբեկչական գործողությունների Կիեւ-2 խմբի ակտիվ մասնակից, ուկրաինական զինված ոիժերի լեյտենանտ, Ուկրաինայի ազգային հերոս:

Ամինայի ամուսինը` Ադամ Օսմաեվը, ծնունդով Չեչնիայից է: 2012 թվականին նա ձերբակալվեց` այն օրերին նախագահի թեկնածու Վլադիմիր Պուտինի դեմ մահափորձ ծրագրելու մեղադրանքով: Օսմաեվն այդ ժամանակ ընդունել էր մեղքը, սակայն որոշ ժամանակ անց հերքում էր առաջադրված մեղադրանքն ու հայտարարում կտտանքների ենթարկվելու մասին: 2014 թվականին հիշյալ գործի քննությունը դադարեցվում է: Միաժամանակ, Օսմաեւը մեղադրվում էր նաեւ անօրինական զենք-զինամթերք կրելու, օգտագործելու եւ կեղծված անձնագիր օգտագործելու մեջ: Այս հոդվածներով 2014-ին նա մեղավոր ճանաչվեց, բայց ազատվեց դատարանի դահլիճից, քանի որ սահմանված պատժաժամկետը`2 տարի 9 ամիս, արդեն անցկացրել էր ՁՊՎ-ում: