Վտանգավո՞ր է արդյոք ոգելից խմիչքը հղիության ժամանակ

Հղիության ժամանակ ոգելիցի ցանկացած քանակություն վտանգավոր է ու կարող է երկարաժամկետ հետեւանքներ ունենալ երեխայի առողջության համար, նախազգուշացնում են Binghamton University (ԱՄՆ) համալսարանի գիտնականները։

Հղիության ժամանակ կնոջ կողմից գործածված ոգելից ընպելիքների նույնիսկ ամենաանշնան քանակությունը զգալիորեն ավելացնում է երեխաների մոտ տագնապալի վիճակների մակարդակը։ Այդ վիճակները հետագայում դիտարկվում են մանկական ու դեռահասության տարիքում, նաեւ մեծահասակների մոտ։

Գիտնականներին մինչ այդ նույնպես հայտնի էր, որ հղիության ժամանակ ոգելից խմիչք օգտագործելը վտանգավոր է, բայց նախկինում խոսում էին ոգելիցի զգալի ծավալների մասին։ Իսկ հիմա ապացուցված է, որ վտանգավոր է նույնիսկ մի քանի գրամ ոգելիցը։

Փորձարկումների ժամանակ հղի լաբորատոր առնետներին 6 ժամ ենթարկել են էթանոլի գոլորշիների ազդեցությանը, իսկ հետո հատուկ թեստերի միջոցով հետազոտել են նրանց սերնդին՝ չափելով նրանց տագնապի մակարդակը։ Պարզվել է, որ այդ մակարդակը առավելագույն բարձր էր որձերի մոտ նրանց դեռահասության տարիքում։ Հասունացումից հետո էֆեկտը հակառակն էր։ Որձ առնետների մոտ, որոնց մայրերը հղիության ժամանակ շնչել էին էթանոլի գոլորշի, ավելի ցածր տագնապի մակարդակ են ունեցել, իսկ ահա էգերի մոտ այդ մակարդակն առհասարակ չէր փոխվել։ Ամենակարեւորն այն է, որ ամբողջ հղիության ընթացքում առնետներին ընդամենը մեկ անգամ էին ենթարկել սպիրտի գոլորշիների ազդեցությանը։ Իսկ դա ապացուցում է, որ ոգելիցի նույնիսկ աննշան մակարդակն է բացասաբար ազդում սերնդի առողջության վրա։ Հետեւաբար հղիության ժամանակ կանանց խորհուրդ է տրվում հրաժարվել ցանկացած քանակությամբ ոգելից խմիչքից։