Ռուբոշը չի մասնակցել, Մհերիկն էլ Էդմոնի երեխաների հետ էր խաղում․ մանրամասներ՝ Պողոսյանի տան հավաքույթից

Hraparak.am-ը գրում է․

Երեկ ԱԺ պատգամավոր, «Քաղաքացիական պայմանագիր» կուսակցության վարչության անդամ Նիկոլ Փաշինյանն իր կնոջ ու երեխաների հետ և ԱԺ պատգամավոր, «Լուսավոր Հայաստան» կուսակցության ղեկավար Էդմոն Մարուքյանն իր ընտանիքով հյուրընկալվել էին ԱԺ մեկ այլ պատգամավոր Թևան Պողոսյանի տանը՝ գինու սեղանի շուրջ մտորելու։

Նշենք, որ այս հավաքույթը տեղի ունեցավ այն բանից հետո, երբ Թևան Պողոսյանը, Փաշինյանի ու Մարուքյանի միջև հեռակա բանավեճին ու լարվածությանը վերջ դնելու ակնկալիքով, նրանց բաց նամակով հրավիրեց իրենց տուն՝ իր քաշած տնական գինու սեղանի շուրջ զրուցելու։

Փաշինյանն ու Մարուքյանը ընդունեցին հրավերը, բայց Փաշինյանը պայման դրեց, որ քաղաքական հարցեր չեն քննարկվելու։ ԱԺ ՀՀԿ խմբակցության պատգամավոր, ՄԻԱԿ անդամ Լևոն Մարտիոսյանն էլ առաջարկել էր, որ եթե քաղաքական հարցեր, ամեն դեպքում, քննարկվեն, ապա դրանց ՄԻԱԿ-ի կողմից մասնակից դարձնեն նաև իր 7-ամյա որդի Ռուբոշին (Ռուբեն Մարտիրոսյանին) և Թևան Պողոսյանի որդի Մհերիկին՝ (Մհեր Պողոսյանին): Նրանք համադասարանիցներ են, և Ռուբոշն այդ օրը Թևան Պողոսյանի բնակարանում էր՝ Մհերիկի հրավերով։

Թևան Պողոսյանն այսօր լրագրողներին ասաց, որ իրենք ունեցել են ջերմ, ընտանեկան հանդիպում, որտեղ որևէ քաղաքական հարց չի քննարկվել։ Խոսել են ընտանիքներից, արմատներից, երեխաներից, բայց ոչ՝ քաղաքականությունից կամ երկու ուժերի միջև եղած տարաձայնություններից։ Պատգամավորը նկատեց, որ սրանով հյուրընկալված երկու պատգամավորները նոր մշակույթ ձևավորեցին, ինչի համար ինքը շնորհակալ է։

Hraparak.am-ի հարցին՝ իսկ ՄԻԱԿ-ից Ռուբոշն ու Մհերիկը մասնակցեցի՞ն, Պողոսյանը պատասխանեց. «Ոչ, Մհերիկը այնտեղ էր, բայց Էդմոնի երեխաների հետ էր խաղում»։

Թե ինչ են նախընտրել խմել՝ պատգամավորն ասաց, որ երկու ընտանիքներն էլ խմել են իր քաշած տնական գինին, իսկ վերոջում իրար հետ էլ դուրս են եկել։

Վահե ՄԱԿԱՐՅԱՆ