Ինչով է վճարելու Սերժ Սարգսյանն իր վարչապետության համար

«Լրագրի» զրուցակիցն է քաղաքագետ Աղասի Ենոքյանը.

Պարոն Ենոքյան, Սերժ Սարգսյանը Հայաստան-ԵՄ համաձայնագրի ստորագրումից առաջ մեկնելու է Մոսկվա։ Ձեր կարծիքով՝ վտանգներ կա՞ն, որ Կրեմլը ճնշումներ կգործադրի խափանելու Հայաստան-ԵՄ շրջանակային համաձայնագրի ստորագրումը։

Կարծում եմ՝ մի շարք խնդիրներ կան, որոնց շուրջ Սերժ Սարգսյանը պետք է խոսի Կրեմլի հետ։ Դրանից առաջինը, իհարկե, Հայաստան-ԵՄ համաձայնագիրն է։
Դժվար է ասել, թե այս այցի արդյունքում հնարավոր է ԵՄ-ի հետ համաձայնագիրը ստորագրվի կամ չստորագրվի։ Ամեն դեպքում, երկկողմանի պահանջներ են դրվում։ Այսինքն՝ ստորագրելու դեպքում Հայաստանը պետք է կատարի այս-այս պահանջները, իսկ չստորագրելու դեպքում միգուցե Ռուսաստանից ինչ-որ զիջումներ պոկի։ Այնպես որ, կարծում եմ, որ այս հարցը նորից պետք է քննարկվեր հայ-ռուսական հարաբերությունների տիրույթում։
Մյուս կարևոր հարցը մնում է վարչապետության հետ կապված խնդիրը։ Ակնհայտ է, որ այդ հարցը չի լուծվում Հայաստանի հասարակության հետ, անգամ չի լուծվում ՀՀԿ-ի շրջանակներում։ Հայաստանը հասել է այն վիճակին, որ իր վարչապետի հարցում թույլտվությունը պետք է ստանա Մոսկվայից։ Եվ այդ հարցը ևս կքննարկվի այնտեղ։ Այնպես չէ, որ Սերժ Սարգսյանը կարող է չլինել վարչապետ։ Պարզապես վարչապետ դառնալու համար նա պետք է Կրեմլին մատուցի բազմաթիվ մանր ու մեծ ծառայություններ։
Եվ, իհարկե, կա նաև Ղարաբաղի հարցը։ Այդ հարցը, կարծում եմ, միշտ հայ-ռուսական հարաբերությունների առանցքում պետք է լինի, մանավանդ որ ինչ-որ նոր զարգացումներ են տարածաշրջանում նկատվում, Ռուսաստանն Իրանի հետ ինչ-որ պայմանավորվածությունների է գալիս, ինչը բնական է, որովհետև միջազգային մեկուսացման մեջ գտնվող երեք երկրները՝ Ռուսաստանը, Իրանը և Թուրքիան, գտնվում են մեր շրջապատում։ Այդ երեք երկրների արանքում ճզմված են կովկասյան երեք պետությունները։ Այս ռեգիոնալ տերությունների համար այս երկրների զարգացումները մանրադրամ են դառնում։ Դրանցից առաջինը Ղարաբաղի հարցն է, որովհետև, կարծեք թե, մյուս երկրների հետ գոնե այս պահին այլ խոշոր հարցեր չկան։

շարունակությունը՝ կայքում