Մրցակցության արդյունքը. շաքարավազը կտրուկ էժանացել է

Այս տարվա ընթացքում շաքարավազի գները կտրուկ նվազել են` շուրջ 14 տոկոսով, ինչը պայմանավորված է մրցակցության ծավալմամբ եւ խորացմամբ: Այս մասին ՏՄՊՊՀ-ի՝ Տավուշի մարզ կատարած այցի ժամանակ լրագրողների հետ զրույցում նշել է ՀՀ տնտեսական մրցակցության պաշտպանության պետական հանձնաժողովի նախագահ Արտակ Շաբոյանը:

Նրա խոսքով, շաքարավազի շուկայում այս պահին կան 50 ընկերություններ, որոնք իրականացնում են շաքարի ներկրում, ինչի արդյունքում գները կտրուկ նվազել են՝ կազմելով 335 դրամ:

«Ճիշտ է շաքարի շուկայում գործող ընկերությունների մեծ մասը փոքր ընկերություններ են կամ անհատ ձեռներեցներ, որոնք փոքր խմբաքանակով են իրականացնում ներկրումը, սակայն գլխավորն այն է, որ չկան մուտքի խոչընդոտներ, արգելքներ ու սահմանափակումներ»,-նշեց նա:

Շաբոյանը հավաստիացրեց, որ այժմ շաքարավազը վաճառվում է հնարավոր նվազագույն գներով: Նրա փոխանցմամբ, մեր երկրի պայմաններում պետք է հաշվի առնել այն, որ տրանսպորտային ծախսերն ուղղակիորեն ազդում են գների վրա, իսկ ՏՄՊՊՀ-ն գնագոյացման խնդրին առնչվում է այն պարագայում, երբ գնագոյացման հարցում խոչընդոտներ է տեսնում, որպեսզի թույլ չտա չարաշահումներ եւ ապահովի հավասար պայմաններ բոլորի համար:

Նշենք, որ 2016 թվականի հոկտեմբերին Հայաստանում շաքարավազն արժեր 395 դրամ, իսկ այս տարվա հունվարին՝ արդեն 406 դրամ: Ի դեպ, այս տարվա առաջին կիսամյակի տվյալներով, Հայաստան ներկրված շաքարի մոտ 82 տոկոսը ներկրել է Սամվել Ալեքսանյանին պատկանող ընկերությունը: