Մոուրինյոն լաց չի լինում. նա նոր հնարավորություն կտա Մխիթարյանին

1in.am / Անգլիայի Պրեմիեր լիգայի 11-րդ տուրի կենտրոնական խաղում «Մանչեսթեր Յունայթեդը» Լոնդոնում կմրցի «Չելսիի» հետ: «Յունայթեդի» գլխավոր մարզիչ Ժոզե Մոուրինյոն այս հանդիպումից առաջ հայտարարել է, որ շատ լրագրողներ և փորձագետներ իր թիմին չեն հարգում: «Ուշադրություն դարձերք թե քանի ֆուտբոլիստներ վնասվածքի պատճառով չեն կարող օգնել «Յունայթեդին»: Կազմի հետ կապված ունենալով լուրջ խնդիրներ, Անգլիայի Պրեմիեր լիգայում այս պահին երկրորդ հորիզոնականում ենք, իսկ Չեմպիոնների լիգայի խաղարկությունում 4 խաղում նույնքան հաղթանակ ենք տարել:

Այսքանից հետո քննադատում են մեզ թույլ ֆուտբոլ ցուցադրելու մեջ: Մեղավորը ես եմ: Երևի թե ամեն շաբաթ պետք է լաց լինեմ, որ Պոգբան վնասվածք ունի, Ֆելաինին չի կարող օգնել մեզ: Եթե իմ տեղը լիներ ուրիշ մասնագետ, կասեր՝ ախ, եթե լիներ Պոգբան, արդեն 10 խաղ է չկա Պոգբան: Խղճացեք մեզ, խնդրում եմ: Ես ունեմ արժանապատություն և միշտ պատրաստ եմ պայքարելու այն կազմով, որն ունեմ ձեռքիս տակ»,- ասել է Մոուրինյոն: Վերջինս հույս է հայտնել, որ վաղվա խաղում իր թիմը դրական արդյունքի կհասնի:

«Չելսիի» գլխավոր մարզիչ Անտոնիո Կոնտեն, անդրադառնալով առաջիկա հանդիպմանը, հայտարարել է, որ դիմակայության կարևոր բաղադրիչներից պետք է լինի փոխադարձ հարգանքը: «Ես ատելություն չեմ տածում Մոուրինյոյի նկատմամբ: Մենք պետք է հարգենք միմյանց: Մոուրինյոն պետք է հարգի ինձ: Այո նա ինձ վիրավորել էր, բայց մենք պրոֆեսիոնալ ենք և մեր հարաբերությունները միայն ու միայն պրոֆեսիոնալ հարթության վրա պետք է լինեն»,- նշել է Կոնտեն: Վերջինը խուսափել է պատասխանել հարցին՝ սեղմելո՞ւ եք Մոուրինյոյի ձեռքը խաղից հետո, թե՞ ոչ: Հիշեցնենք, որ Մոուրինյոյի և Կոնտեի հարաբերությունները լարվել էին նախորդ տարվա հոկտեմբերին տեղի ունեցած «Չելսի»-«Մանչեսթեր Յունայթեդ» հանդիպումից հետո:

Մասնավորապես՝ Մոուրինյոյին զայրացրել էր այն, որ Կոնտեն չափից շատ էր ոգևորվել, երբ «Չելսին» խփել էր 4-րդ գոլը: Դրանից հետո իտալացի մասնագետը հայտարարել էր, որ Մոուրինյոն հանդիպման ժամանակ ստորացրել էր իրեն:

Ինչևէ, բրիտանացի շատ փորձագետների աղբյուրների համաձայն՝ վաղը Մոուրինյոն պատրաստվում է պայքարել իր համար ինչ-որ տեղ անսովոր 3-4-1-2 մարտավարությամբ, որտեղ գլխավոր ֆիգուրներից մեկը լինելու է ենթահարձակվողի, կամ ինչպես ընդունված է ասել՝ 10 համարի դիրքում հանդես եկող Հենրիխ Մխիթարյանը:

Մասնավորապես, դարպասում կլինի Դե Խեան, իսկ պաշտպանության կենտրոնում՝ Ջոնսը, Սմոլինգը և Բային: Ձախ եզրից խաղացող Յանգ ու աջ եզրում գտնվող Վալենսիան ավելի շատ կմիանան գրոհների: Նրանք մասնավորապես կկատարեն եզրային կիսապաշտպանի պարտականութունը: Որպես հենակետային կիսապաշտպաններ կխաղան Մատինչն ու Էրերան: Ինչպես նշել էինք՝ ենթահարձակվողի դիրքում կլինի Մխիթարյանը, իսկ Ռեշֆորդն ու Լուկակուն կխաղան որպես նոմինալ հարձակվողներ: 4-3-2-1 դասավորությունից, անցնելով 3-4-2-1 մարտավարության Մոուրինյոն տակտիկական լուրջ փոփոխություն է կատարում: Խաղալով 3 կենտրոնական պաշտպաններով, նա կուժեղացնի կիսապաշտպանության թիկունքը, իսկ երկու հարձակվողի առկայությունը ազատ գործելու հնարավորություն կտա ենթահարձակվողին, տվյալ դեպքում՝ Հենրիխ Մխիթարյանին:

Վերջինիս համար ստեղծելով դրսևորվելու տարածություն, Մոուրինյոն հույս ունի, որ հայ ֆուտբոլիստը կվերգտնի խաղը: Նկատենք, որ կարևորագույն այս խաղում Մխիթարյանից շատ բան է կախված լինելու: Հենց մեր ֆուտբոլիստի գործողություններից է կախված լինելու երկու հարձակվողների արդյունավետ խաղը: Վերջին շրջանում խիստ քննադատության է ենթարկվում նաև Լուկակուն, որին չի հաջողվում գոլեր խփել:

«Մանչեսթեր Յունայթեդի» նախկին կիսապաշտպան Փոլ Սքոուլզը BT Sport-ի թղթակցի հետ զրույցում խոսելով Մոուրինյոյի գլխավորած թիմի ներկայիս խնդիրների մասին, կարծիք էր հայտնել, որ առջևի գծում առկա խնդիրների գլխավոր պատճառը Պոլ Պոգբայի բացակայությունն է: «Մխիթարյանի խաղի անկման պատճառը Պոգբան է: Նրա բացակայության հետևանքով գոլային երաշտ է նաև Լուկակուի մոտ: Մեկնարկային երեք խաղերում Մխիթարյանը 5 գոլային փոխանցում կատարեց, իսկ վերջին շրջանում նրա խաղը չի ստացվում: Մխիթարյանին չի հաջողվում օգնել Լուկակուին հաջողության հասել:

Այդուհանդերձ այս ֆուտբոլիստներին չի կարելի մեղադրել: Կրկին անգամ ուզում եմ ասել, որ պատճառը Պոգբայի բացակայությունն է: Թե՛ Մխիթարյանը և թե՛ Լուկակուն աջակցության կարիք ունեն: Կարծում եմ՝ ամեն ինչ կկարգավորվի, երբ Պոգբան վերադառնա: Այս ֆուտբոլիստը միավորում է թիմը: Հարկավոր է մի փոքր էլ համբերել»,- ասել է Սքոուլզը: Փոխելով մարտավարական սխեման, Մոուրինյոն փորձում է լրացնել Պոգբայի բացը, միևնույն ժամանակ հնարավորություն ընձեռնում Լուկակուին և Մխիթարյանին: