Կարող են աղմկոտ ձերբակալություններ լինել, եթե...

Հայաստանում կոռուպցիայի դեմ պայքարի ուղղությամբ քայլ առ քայլ աշխատանք է տարվում, բայց տեմպերը շատ դանդաղ են: Lragir.am-ի հետ զրույցում նման դիտարկում արեց «Թրանսփարենսի ինթերնեշնլ» հակակոռուպցիոն կենտրոնի գործադիր տնօրեն Սոնա Այվազյանը՝ հույս հայտնելով, որ հետագայում արդյունքներ կլինեն:
Ինչպես հայտնի է, ընդյայնվել է այն պաշտոնյաների ցանկը, ովքեր Բարձրաստիճան պաշտոնատար անձանց էթիկայի հանձնաժողով պետք է գույքի և եկամուտների հայտարարագրեր ներկայացնեն: Արդեն մի շարք կառույցների միջին ու մանր օղակի պաշտոնյաների հայտարարագրերը հրապարակվել են հանձնաժողովի կայքում:
Հարցին, թե սա ի՞նչ փոխեց կոռուպցիայի դեմ պայքարում, Սոնա Այվազյանը պատասխանեց, որ ցանկի ընդլայնումը դրական է այն առումով, որ հանրությունը մի խումբ պաշտոնյաների ունեցվածքի վերաբերյալ նույնպես տեղեկություն է ստանում:
«Ինչ վերաբերում է հարցին, թե որքանո՞վ դրանով բարելավվեց այն իրավիճակը, որ պետք է հետամուտ լինել այդ գործերին, կամ թե Էթիկայի հանձնաժողովը որքանով է ուսումնասիրում ու բացահայտում ապօրինի հարստացումը, կամ գույքի ու եկամուտների ստացման աղբյուրները որքանով են երևում, դեռևս անելիքներ կան: Որոշ տեղեկություններ հանրությունից թաքցվում են: Դրա համար մենք դեռ մեծ առաջընթաց չենք տեսնում», ասաց նա:
Ինչ վերաբերում է հանրության կողմից հարստացող պաշտոնյաների նկատմամբ վերահսկողություն իրականացնելու հնարավորությանը, Սոնա Այվազյանը նշեց, որ այսօր կա որոշ տեղեկատվություն, որը հանրության համար փակ է: Եվ միտումնավոր է փակ: Օրինակ՝ պաշտոնյայի հայտարարագրում նշվում է, որ նա միլիոնների նվիրատվություն է ստացել, բայց թե ումից է ստացել, դա չի երևում: Կամ էլ գրվում է, որ եկամուտ է ստացել, բայց այդ եկամտի աղբյուրը չի երևում:

մանրամասն՝ կայքում