Կանխատեսումներն իրականանում են

Chi.am-ում կարդում ենք․

Անցած օրերը բավական հանգիստ էին։ «Մանչեսթեր Յունայթեդը» առանց Մխիթարյանի հաղթանակ տարավ, Մոուրինյոն էլ խաղից հետո հայտարարեց, թե երբ Հենոն լավ մարզավիճակում կլինի, այն ժամանակ էլ թիմի կազմում կընդգրկվի։ Մեր ամենավատ կանխատեսումները իրականանում են։ Մխիթարյանը նոր թիմում տեղ չունի, իսկ այդ ընթացքում նրա նախկին թիմը` Դորտմունդի «Բորուսիան», մեկը մյուսից գեղեցիկ համերգներ է տալիս։

Առանց Հենոյի։ Թեպետ մի աղմկալից իրադարձություն էլ է տեղի ունեցել, որի մասին արդեն 2 օր շատ բուռն բանավեճեր են ընթանում։ Խոսքը Հ1-ով ինչ-որ «Ռաբիսի» փառատոնի մասին է, որի հյուրերը մեր ռաբիս երաժշտության ամենաքյարթու դեմքերն են եղել։ Բայց մենք այս թեմային չենք անդրադառնում, քանի որ 5-6 տարի այդ ալիքը չենք դիտում, հետեւաբար, ռաբիս տեսնելու հաճույքից էլ զրկված ենք։

Մեր մի քանի այլ կանխատեսումներ էլ իրականացան։ ԱԺ պատգամավոր Թեւան Պողոսյանի հարկի ներքո ՔՊ եւ ԼՀ առաջնորդները այնուամենայնիվ համատեղ գինի խմեցին, ինչը բոլոր դեպքերում ողջունելի է։ ՀՀ էկոնոմիկայի նախարարի պաշտոնակատար Արծվիկ Մինասյանը կլքի պաշտոնը եւ կստանձնի բնապահպանության նախարարի դժվար գործը։ Այժմ արդեն ՀՅԴ-ն հաստատ լուրջ, համակարգային փոփոխությունների սկիզբը կդնի, ինչպես ազդարարել էր Սերժ Սարգսյանի հետ հուշագիր ստորագրելիս եւ 3 նախարարական աթոռ ստանալիս։ Ու այլեւս առանց էկոնոմիկայի հետ կապված գլխացավանքների։

Այս առթիվ ՀՅԴ խմբակցության քարտուղար Աղվան Վարդանյանը երեկ շատ գոհ էր. բացի նրանից, որ Արծվիկ Մինասյանը կշարունակի նախարար լինել, դեռ վարչապետն էլ ասել է, ափսոս, որ Արծվիկին կառավարության նիստում դիտողություն անելս աղմուկ է բարձրացրել։

Աղվան Վարդանյանը նույնիսկ արդեն փաստաբանի տոնով հիմնավորել է, թե ինչու վարչապետ Կարեն Կարապետյանը Ա. Մինասյանին չէր ցանկանում տեսնել արդեն անվանափոխված էկոնոմիկայի նախարարությունում. «Վարչապետը նոր արդեն անվանումով նախարարությունում պատկերացնում է ավելի բիզնես մտածողություն ունեցող անձ, բիզնեսի հետ կապ ունեցող անձ»։ Որքան հասկացանք, նոր նախարար է նշանակվելու կամ Սամվել Ալեքսանյանը, կամ Լիսկան, կամ էլ Սաշիկ Սարգսյանը. մեր երկրի ամենաբիզնես մտածողություն ունեցող, բիզնեսի հետ կապ ունեցող անձինք։

ՄԻ ՏԵՐՏԵՐ ԿԱՐ, ՄԻ ՇՈՒՆ ՈՒՆԵՐ...

Ինչեւէ, կտեսնենք, թե ով է այդ գործարար ջիղ ունեցողը, բայց քանի որ Ա. Մինասյանին տանում են բնապահպանության նախարարություն, նշանակում է, որ այդ ոլորտի նախարարի պաշտոնակատար Արամայիս Գրիգորյանին պիտի հանեն։ Եթե հանում են, նշանակում է, ինչ-որ տեղ պիտի տեղավորեն, քանի որ լրիվ «չուժոյ պախմել» տուժում է։ Կան խոսակցություններ, որ մարզպետ են նշանակելու, ամենահավանականը Արարատի մարզն է։ Դա վատ է, քանի որ եթե նշանակեն Արարատի մարզպետ, ապա ներկայիս մարզպետ Ռուբիկ Աբրահամյանին պիտի ուրիշ գործի տեղավորեն, բայց այդ դեպքում էլ որտեղ տեղավորեն, նշանակում է, այդ գործը կորցրած մարդուն պիտի ուրիշ տեղ տեղավորեն եւ կախարդական այս շրջանը երբեք չի վերջանա, վարչապետի կառուցվածքային փոխատեղումները կադրային փոփոխությունների հավերժական շարժիչ կդառնան։ Ինչպես «Մի տերտեր կար, մի շուն ուներ...» հավերժ բանաստեղծությունը։

Դրա համար պետք է Արամայիս Գրիգորյանին նշանակել Սյունիքի մարզպետ, իսկ այդ պաշտոնից զրկված Սուրիկ Խաչատրյանին ոչ մի գործ չտալ։ Միանգամից բազմաթիվ գլխացավանքներից կազատվենք։ Ավելին, հանցավորության դեմ պայքարի շրջանակներում Սուրիկ Խաչատրյանին կարելի է գործուղել իր ջահել վախտվա վայրերը` ՀՀ վաստակաշատ, լեգենդար, բազմակողմանի լրագրող Սամվել Ալեքսանյանի հետ միասին, թող այդ վայրերից ռեպորտաժներ ուղարկեն։

ԼԵՎՈՆ ՄԿՐՏՉՅԱՆԻ ՀԱՅՐԵՆԻՔԸ

Իսկ ահա մյուս դաշնակցական նախարարի` Լեւոն Մկրտչյանի հետ կապված անսպասելիորեն հարցեր են առաջացել։ Իրեն էլ էին ցանկանում հանել գործից եւ, մեր տեղեկություններով, նույնպես բնապահպանության նախարար նշանակել, բայց ՀՀ կրթության եւ գիտության նախարարի պաշտոնակատարը շտապել է հայտարարել, թե Պուտինն ու Ռուսաստանն իր թիկունքին կանգնած են, իսկ ԱՊՀ-ն իր հայրենիքն է։

Այո, այո, նույնիսկ ՀՀ կրթության եւ գիտության նախարարության պաշտոնական կայքէջում տեղադրել է «ԱՊՀ-ն իմ հայրենիքն է» միջազգային մրցույթի անցկացման մասին հայտարարություն` որպես հավատարմության նշան։ Եվ այդ ամբողջ տեքստը, մրցույթի պայմաններն ու ամեն ինչ` ռուսերեն։ Դե, ո՞նց հանի Կարեն Կարապետյանն այսպիսի ԱՊՀ-ամոլ մարդուն։ Հետո՞ ինչ, որ ազգային-ռազմահայրենասիրական հարյուրեսիմքանիամյա կուսակցություն է ներկայացնում։ Խառը ժամանակներ են, որտեղ` նախ պաշտոն, հետո` ազգային հարցեր։ Չենք զարմանա, եթե մի օր նրա նախարարության կայքն ամբողջովին ռուսիֆիկացվի, մի քիչ էլ` չինարեն լինի։