«Կարծում եմ՝ արդեն կայացած եմ». Մաշ Իսրայելյան / լուսանկարներ

 

«Հայաստանի ձայնը» նախագծի չորրորդ եթերաշրջանի մասնակից Մաշ Իսրայելյանը, որին Արամեն ի սկզբանե առանձնացրեց` որպես հավանական հաղթող,  օրերս ներկայացրել է տեսահոլովակ՝ «Իմ միակ» երգի հիման վրա:

 

Tert.am Life-ը երգչուհու հետ զրուցեց գործունեության մասին։ Թեև Մաշ Իսրայելյան անունը հանդիսատեսին հայտնի դարձավ «Հայաստանի ձայնը» նախագծով, երիտասարդ երգչուհին պատմեց, որ վաղուց է երգում։ Ավելին, սա  նրա առաջին տեսահոլովակը չէ։ Մեկ տարի առաջ նա  ներկայացրել է իր առաջին տեսահոլովակը, որը բնորոշում է որպես սիրողական։

 

«Առաջին տեսահոլովակից հետո որոշեցի դադար տալ և ավելի հզոր գործով ներկայանալ: Եթե ոչ մինչև տարեվերջ, ապա առաջիկա ամիսներին, անպայման, կներկայացնեմ ևս մեկ տեսահոլովակ»,- ասաց երիտասարդ երգչուհին։

 

 

Մաշի խոսքով` դուետով հանդես գալու մի շարք առաջարկներ ունի։ Ավելին, արդեն ընտրել է, թե ում հետ է զուգերգ կատարելու։ «Չգիտեմ՝ հանդիսատեսին առաջինը ներկայացնեմ զուգերգի՞, թե՞ սոլո երգի տեսահոլովակը, բայց շատ նորություններ ունեմ: Քանի որ մասնակցում եմ «Հայաստանի ձայնը» նախագծին, չգիտեմ՝ կհասցնեմ մինչև տարեվերջ նոր տեսահոլովակով հանդես գալ, թե՝ ոչ։ Ամեն դեպքում առաջիկա ամիսներին հաստատ նորություն կունենամ»,- ասաց նա։

 

«Հայաստանի ձայնը» նախագծի մարզիչ Արամեն երգչուհու ելույթից հետո ասաց, որ նրան տեսնում է որպես ապագա «Հայաստանի ձայն»։ Մաշ Իսրայելյանը նշեց, որ այդ խոսքերին արժանանալու համար շատ է աշխատել. «Ամեն ինչ անում եմ, որ լավ ներկայանամ, բայց հուզմունքը հաճախ խանգարում է»:

 

Նրանից հետաքրքրվեցինք, թե մասնակիցներից ում է համարում իր մրցակիցը։ «Ոչ մեկին չեմ կարող առանձնացնել, բոլորին ինձ մրցակից եմ համարում: Մրցույթ է, և բոլորը մրցակիցներ են»,- ասաց նա:

 

 

Երգչուհին ասաց, որ միաժամանակ զբաղվել է և՛ դասական,  և՛ էստրադային վոկալով, ի վերջո, ընտրել է էստրադային վոկալը: «5 տարեկանում ընդունվել եմ Երգի պետական թատրոն, երգել եմ «Աստղիկ» ստուդիայում, սովորել եմ Չայկովսկու անվան երաժշտական դպրոցում, հանդես եմ եկել մի շարք հաղորդումներում։ Չնայած փոքր ժամանակ մի շարք համերգների եմ մասնակցել, չեմ ցանկացել տեսահոլովակով հանդես գալ։ Միշտ մտածել եմ, երբ կայանամ, նոր կներկայացնեմ տեսահոլովակ, կարծում եմ՝ արդեն կայացած եմ»,- ասաց նա:

 

Մաշ Իսրայելյանի մայրը՝ Նարինե Մանուկյանը, 11 տարի երգել է Օրբելյանի խմբում։ Ըստ նրա` քույրը ևս ձայնային լավ տվյալներ ունի, սակայն  ընտրել է դիզայներ-մոդելավորողի մասնագիտությունը: Հագուստի ընտրության հարցում Մաշին օգնում է քույրը:

 

Խոսելով երազանքների մասին՝ երգչուհին ասաց, որ միշտ ցանկացել է լինել կայացած, սիրված երգչուհի, իսկ երազանքի կետը, որին ձգտել է, կբացահայտի, երբ հասնի դրան։