Թբիլիսիում ավարտվեց հատուկ օպերացիան. կան զոհ ու վիրավորներ

Վրաստանի պետական անվտանգության ծառայության հակաահաբեկչական բաժինն ավարտել է Թբիլիսիի Իսանի-Սամգորի թաղամասում երեկ գիշերվանից շարունակվող հատուկ գործողությունը: Այդ մասին հայտնում է Sputnik-Վրաստանը՝ վկայակոչելով Rustavi2 հեռուստաալիքը:

Новости-Грузия-ն, վկայակոչելով Թբիլիսիի «Ինգորոկվա» հիվանդանոցի բժիշկին, հայտնել է, որ հիվանդանոցում մահացել է այսօր առավոտյան վիրավորված Վրաստանի պետական անվտանգության ծառայության հատուկ օպերատիվ բաժնի աշխատակիցը, ով մասնակցում էր Թբիլիսիի ծայրամասում բնակելի շենքերից մեկում արգելափակված, ահաբեկիչների հետ կապերի համար կասկածվող անձանց ձերբակալության հատուկ գործողությանը:

ԶԼՄ-ների տվյալներով՝ հատուկջոկատայինը գլխի վնասվածք էր ստացել կասկածյալների հետ փոխհրաձգության ժամանակ:

Ահաբեկիչների հետ կապերի համար մեղադրվող երկու անձանց ձերբակալության հատուկ գործողությունը սկսվել է անցած գիշեր: Կասկածյալները հրաժարվել են հանձնվել և կրակ են բացել հատուկ նշանակության ջոկատի ուղղությամբ: Մեղադրյալները թաքնվում են բազմաբնակարան շենքի բնակարաններից մեկում:

Ողջ գիշեր հնչել են կրակոցներ և պայթյուններ: Առավոտյան մոբիլիզացվել են հատուկ նշանակության լրացուցիչ ուժեր: Գաբրիել Սալոսի փողոց զրահապատ տեխնիկա է բերվել՝ «Կոբրա» ոստիկանական չորս մեքենա:

Չհաստատված տեղեկություններով՝ վիրավորվել է երեք մարդ: Վրաստանի պետական անվտանգության ծառայությունում հայտնել են մեկ ձերբակալվածի մասին: Ենթադրաբար, կասկածյալներից մեկը ոչնչացվել է:

Շենքում, որտեղ իրականացվել է հատուկ գործողությունը, կրակոցների և պայթյունների հետևանքով ուժեղ հրդեհ է բռնկվել: Հատուկ գործողության իրականացման վայրում մոբիլիզացվել են հրշեջ-փրկարարական ջոկատները: Հրդեհին նախորդել է ինտենսիվ փոխհրաձգությունը:

Ոչ պաշտոնական տեղեկություններով՝ հատուկ նշանակության ջոկատի կողմից արգելափակված բնակարանում երեք անձ է եղել, ովքեր կասկածվում են ահաբեկչական գործունեության համար: Տեղեկությունների համաձայն՝ նրանք ազգությամբ չեչեն են և «Իսլամական պետության» անդամներ:

Հաղորդվում է, որ հնարավոր է՝ հատուկ գործողությունը երկար ժամանակ է պահանջել այն պատճառով, որ բնակարանում մեծ քանակությամբ պայթուցիկներ են եղել: